काठमाडौं । हिमालयन एयरलाइन्सले चीनको छिङदाओमा कुटनीतिक चार्टर्ड उडान सञ्चालन गरेको छ ।

परराष्ट्र मन्त्रालयको विशेष अनुरोधमा कम्पनीले परराष्ट्रमन्त्री डा. नारायण खड्काको औपचारिक भ्रमणका लागि साउन २४ गते चीनको छिङदाओ (सिङ्ताओ) जाने एक विशेष कूटनीतिक चार्टर उडान सञ्चालन गरेको हो ।

परराष्ट्र मन्त्रालयका ११ सदस्यीय प्रतिनिधिहरुलाई लिएर एयरलाइन्सले सोमबार राति राति ११.०७ बजे छिङदाओ प्रस्तान गरेको थियो भने बुधबार बिहान ७.५५ बजे अवतरण गरिएको छ ।

सन् २०२० मा फैलिएको कोभिड–१९ को महामारीका कारण नेपाल र चीनबीचको हवाई यात्रा दुबै देशले लागू गरेका विभिन्न यात्रा प्रतिबन्ध पश्चात ठप्प भएको थियो ।

यद्यपि, महामारी नियन्त्रण भएर जनजीवन सामान्यतातर्फ फर्किएपछि हिमालयले गत मे ३१ देखि चीनको कुनमिङ जाने आफ्नो निर्धारित उडान तालिका सञ्चालन गर्दै साप्ताहिक रुपमा एउटा उडानका साथ सेवा शुरु गरेको थियो ।

काठमाडौंबाट छिङदाओका लागि सीधा उडान तालिका नभएकाले एअरलाइन्स्ले आवश्यक सबै अनुमति लिएर यो विशेष चार्टर उडान सञ्चालन गरेको हो ।