काठमाडौँ । साउन १५ गतेभित्र डिम्याट (हितग्राही) खाताको वार्षिक शुल्क नबुझाएमा खाता रोक्का (फ्रिज) हुने भएको छ । सीडीएस एन्ड क्लियरिङ लिमिटेड (सीडीएससी) ले सार्वजनिक सूचना जारी गर्दै तोकिएको समयभित्र शुल्क भुक्तानी नगर्ने प्रयोगकर्ताको डिम्याट खाता साउन १६ गतेदेखि रोक्का गरिने स्पष्ट पारेको छ । डिम्याट खाता रोक्का भएपछि लगानीकर्ताले सेयर खरिद-बिक्री तथा हस्तान्तरण गर्न पाउने छैनन्।

सामान्यतया हरेक वर्षको असार मसान्तभित्र बुझाइसक्नुपर्ने यस्तो वार्षिक शुल्क यस पटक सीडीएससीले साउन १५ गतेसम्मका लागि समय थप गरेको हो । डिम्याट खाता प्रयोगकर्ताले प्रतिखाता वार्षिक रु. १०० शुल्क बुझाउनुपर्ने व्यवस्था छ । हाल देशभर डिम्याट खाताको संख्या ८० लाख ९ हजार ६२३ पुगेको छ ।

यस्तै, प्राथमिक सेयर (आईपीओ/एफपीओ), हकप्रद सेयर भरनाका साथै दोस्रो बजारमा बिक्री भएको सेयर हस्तान्तरण गर्न प्रयोग गरिने ‘मेरो सेयर’ सेवाको नवीकरण शुल्क पनि बुझाउन सीडीएससीले आग्रह गरेको छ । मेरो सेयरको वार्षिक शुल्क रु. ५० रहेको छ । हाल मेरो सेयरमा ५१ लाख ४८ हजार ८९४ भन्दा बढी सक्रिय प्रयोगकर्ता रहेका छन् ।

घरमै बसेर अनलाइनबाट यसरी गर्नुहोस् नवीकरण:

डिम्याट र मेरो सेयरको शुल्क लगानीकर्ताले घरमै बसेर डिजिटल भुक्तानी माध्यमहरूबाट सजिलै तिर्न सक्नेछन् । नवीकरण गर्ने प्रक्रिया यस प्रकार छ:

• स्टेप १: सर्वप्रथम आफ्नो Mero Share एप वा वेब पोरटलमा लगइन गर्नुहोस् ।

• स्टेप २: दायाँ पट्टि माथि रहेको आफ्नो नाम (Profile) मा क्लिक गरी ‘Account Information’ मा जानुहोस् ।

• स्टेप ३: त्यहाँ देखिने ‘Renew Account’ विकल्पमा क्लिक गर्नुहोस् ।

• स्टेप ४: अब स्क्रिनमा उपलब्ध भुक्तानी माध्यमहरू (eSewa, Khalti, Prabhu Pay, IME Pay, Connect IPS आदि) मध्ये आफूलाई पायक पर्ने माध्यम छनोट गर्नुहोस् ।

• स्टेप ५: यदि दुवै नवीकरण गर्न बाँकी छ भने ‘Mero Share & DEMAT’ छनोट गरी ‘Proceed’ मा क्लिक गर्नुहोस् ।

• स्टेप ६: आफ्नो डिजिटल वालेट वा बैंकको विवरण (Username/Password) राखेर लगइन गरी भुक्तानी (Pay/Submit) प्रक्रिया पूरा गर्नुहोस् ।

समयमै शुल्क बुझाएर खाता रोक्का हुनबाट जोगिन र सेयर कारोबारलाई निरन्तरता दिन सीडीएससीले सम्पूर्ण लगानीकर्ताहरूमा अनुरोध गरेको छ ।