काठमाडौं । प्रधानमन्त्री केपी शर्मा ओलीले पुनःर्निमित धरहरा अब कहिल्यै नढल्ने बताएका छन् । नवनिर्मित धरहराको उद्घाटन गर्दै ओलीले यस्तो बताएका हुन् । उनले भने , ‘अब उप्रान्त धरहरा ढल्दैन । त्यो सुनिश्चितता गरेका छौं । अन्तिमपटक २०७२ सालमा धरहरा ढल्यो । त्यसबाट भएको क्षतिप्रति हामी संवेदनशील छौं ।’

ओलीले आफ्नो अवधारणा अनुसार धरहरा बनेको र यसको संरचना मजबुत रहेको समेत दाबी गरेका हुन् । ‘ “इतिहास झल्किने र आधुनिकता टल्किने” गरी यसको निर्माण गरिएको छ ।’ उनले भने ।
ओलीले थपे, ‘धरहरामा पार्किङ स्थल लगायतका अन्य संरचना र पुरानो भग्नावशेषलाई संरक्षण गर्नेबारे मैले एकखालको अवधारणा दिएको थिएँ । त्यही अनुसार पुरातत्व विभाग लगायतका डिजाइनरले ती कुराहरुलाई ध्यानमा राखेकोमा म धन्यवाद दिन चाहन्छु ।’

धरहरा उक्लिँदा आफूलाई आइफेल टावर चढ्दाको स्मरण भएको प्रधानमन्त्रीले बताए ।

‘माथि चढ्दा उधुम हावा चल्छ । जति गर्मीमा पनि त्यहाँको हावाले बेग्लै आनन्द दिने गरी निर्माण भएको छ,’ ओलीले भने ।