सुर्खेत । राउटे समुदायका दुई युवतीमाथि यौन दुर्व्यवहार भएको भिडियो सार्वजनिक भएसँगै राउटे वस्तीमा बाहिरी आगमन रोक लगानइएको छ । गुर्भाकोट नगरपालिका–११ मा बस्दै आइरहेका दुई युवतिमाथि यौन दुव्र्यवहार भएको भिडियो सार्वजनिक भएसँगै प्रहरीले राउटे वस्तीमा सुरक्षा कडा बनाएको हो । वस्तीमा बाहिरी मान्छेहरूलाई बस्तीमा प्रवेश रोक्नका लागि करिब तीन दर्जन सुरक्षाकर्मी खटाइएको छ ।

राउटे समुदायका मानिसले सरकारको नियम भन्दा पनि आफ्नै नियममा चल्ने र यदि सार्वजनिक भएको भिडियो राउटे वस्ती सम्म पुगेमा ती दुई युवतिलाई समुदायले जे पनि गर्न सक्ने बताउँदै कर्णालीका मुख्यमन्त्री महेन्द्रबहादुर शाहीले सुरक्षा बढाउन निर्देशन दिएका हुन् ।
मुख्यमन्त्री शाहीका अनुसार अहिले सशस्त्र प्रहरी निरीक्षकको कमाण्डमा ३४ जनाभन्दा बढी प्रहरी खटाइएको छ । दुई युवतीमाथि भएको घटना निन्दनीय रहेको बताउँदै दोषीलाई कडा कारवाही गर्न र ती युवती तथा राउटे बस्तीको सुरक्षा गर्न निर्देशन दिएको उनले बताए ।

उनले पीडित दुवै युवतीलाई बचाउन सरकारले सबै योजना अवलम्बन गरिरहेको बताए । ‘अहिले सुरक्षाको योजना लागू गरिसकेका छौं । त्यहाँको तीन समूहका तीनै राउटे मुखियालाई यहाँ बोलाएको छु । राउटेका मुखियालाई आवश्यक सहयोग गर्ने र युवतीलाई स्वास्थ्य जाँचका लागि अस्पताल पठाउने योजना बनाइरहेका छौं । त्यसका लागि युवतीलाई काउन्सिलिङ गर्न तीन सदस्यीय कार्यदल नै खटाएको छु ।’ उनले भने ।

उनले अनुसन्धानका नाउँमा विभिन्न संस्थाहरुको लाइन लागेर आइरहेको बताउँदै त्यसले ती दुवै युवतीको ज्यान तलमाथि हुने सम्भावना भएका कारण कसैलाई पनि बस्तीनजिक जान नदिइएको बताए ।

२०७८ जेठ २४ गते प्रकाशित