काठमाडौँ । सर्वाेत्तम सिमेन्टको शेयर कित्ता भित्रि कारोबारबाट खरिद गरेको आरोप लागेपछि नेपाल धितोपत्र बोर्डका अध्यक्ष भिष्मराज ढुंगानामाथि अख्तियार आयोगले छानविन सुरु गरेको छ । शेयर बजारको नियामक निकायका प्रमुखहरुले आफ्नो परिवारको नाममा सर्वोत्तमको शेयर खरिद गरेको भेटिएपछि अख्तियारले यस विषयमा अनुसन्धान थालेको हो ।

यता अर्थमन्त्रालयले पनि ढुंगानालाई स्पष्टिकरण माग गरेको छ । यद्यपी सामान्य जानकारी लिन पाएतापनि अर्थ मन्त्रालयले चेतावनीकै रुपमा भने स्पष्टिकरण माग्न नपाउने केही विज्ञहरुले बताउँछन् । तर, अख्तियार स्रोतका अनुसार मन्त्रालयले ढुंगानालाई स्पष्टिकरणको लागि पत्र काट्नु अगाडी नै अख्तियारले छानविन सुरु गरेको हो । स्रोतकाअनुसार अख्तियारले भिष्म ढुंगानाका पछिल्ला गतिबिधिहरुलाई निगरानीमा राखेको छ ।

साथै यस अगाडी ५१ कम्पनी तोकेर लगानीको लागि जोखिम भनेर निकालेको बिज्ञप्तीको पछाडी पनि अरु नै आर्थिक खेल भएको हुन सक्ने अख्तियारको आशंका रहेको छ । ढुंगानाले भ्रष्ट्राचार गरेको भन्दै यस अघि नै आयोगमा उजुरी समेत परिसकेको थियो ।

अध्यक्ष ढुंगानाको छोरी रेबिना ढुंगानाको नाममा सर्बोत्तम सिमेन्टको शेयर खरिद गरिएको फेला परेको हो । त्यस्तै बोर्डका संचालक रहेका चन्द्र ढकालका भाई हेमराज ढकालको नाममा कम्पनीको शेयर खरिद गरिएको भेटिएको छ । नेपाल स्टक एक्सचेन्ज नेप्सेमा प्रमुख कार्यकारी अधिकृत चन्द्र सिंह साउदको श्रीमतीको नाममा पनि शेयर लिएको देखिएको छ ।

बुक विल्डङ विधिबाट आइपिओ निष्काशनको तयारीमा रहेको सर्वोत्तम सिमेन्टको शेयर नियामकको परिवारको नाममा लिएको देखिएपछि अर्थ मन्त्रालयले बोर्ड अध्यक्ष ढुंगाना र नेप्सेका सीइओ साउदलाई ३ दिने स्पष्टिकरण सोधी सकेको छ ।

उता नेपाल धितोपत्र बोर्डको कर्मचारी युनियनले पनि बोर्ड अध्यक्ष ढुंगाना र संचालक ढकाललाई निलम्बन गरि छानविन गर्न माग गरेको छ ।

यो पनि पढ्नुहोस्

नेप्सेका सिईओ साउद, सेबोनका अध्यक्ष ढुंगाना र वरिष्ठ उपाध्यक्ष ढकालले भित्री कारोबार गरेको स–प्रमाण खुलासा

२०७८ साउन १७ गते प्रकाशित