काठमाडौं । एनएमबि बैंकले अनलाइनबाटै कर्जा आवेदन दिन र आवेदनको स्थिति रियल–टाइममा हेर्न सकिने डिजिटल प्रणाली सञ्चालनमा ल्याएको छ।

नयाँ पोर्टलमार्फत ग्राहकले जुनसुकै स्थान र डिभाइसबाट कर्जाका लागि आवेदन दिन सक्नेछन्। आवेदन कुन चरणमा पुगेको छ भन्ने जानकारी पनि अनलाइनमै हेर्न सकिने बैंकले जनाएको छ।

कर्जा आवेदन दिन ग्राहकले digi.nmb.com.np मा लगइन गरी ‘Loan Services’ मा जानुपर्नेछ। त्यसपछि ‘Explore Products’ मा क्लिक गरी आफूलाई आवश्यक कर्जा छनोट गरेर विवरण भर्न सकिनेछ। फारम बुझाएपछि ग्राहकले तत्काल Online Loan Tracking ID प्राप्त गर्नेछन्। उक्त आईडीमार्फत कर्जा आवेदनको स्थिति रियल–टाइममा ट्र्याक गर्न सकिनेछ।

बैंकका अनुसार यो प्रणालीले कर्जा प्रक्रियालाई सरल, पारदर्शी, कागजरहित र समय बचत गर्ने बनाउनेछ। एनएमबि बैंकले हाल देशभर १९७ शाखा, १७६ एटीएम र ९ एक्सटेन्सन काउन्टरमार्फत बैंकिङ सेवा प्रदान गर्दै आएको छ।