काठमाडौं। नेपालका लागि हिरो मोटोकर्पको आधिकारिक वितरक सीजी मोटर्सले आफ्नो बहुप्रतीक्षित एड्भेन्चर सेग्मेन्टको नयाँ स्कुटर जुम १६० आगामी साता नेपाली बजारमा औपचारिक रूपमा बिक्री सुरु गर्ने भएको छ।

कम्पनीले आगामी भदौ ९ गतेदेखि काठमाडौंमा आयोजना हुन गइरहेको ‘नाडा अटो शो २०२६’ को भव्य मञ्च प्रयोग गरी यस स्कुटरको बिक्री तथा वितरण थाल्ने तयारी पूरा गरेको छ। गत वर्षको नाडा अटो शोमा केवल प्रदर्शनीका लागि मात्र राखिएको यो एड्भेन्चर म्याक्सी स्कुटरलाई यसपटक भने नेपाली ग्राहकले सोझै खरिद गर्न पाउने भएका हुन्।

कम्पनीले आफ्ना आधिकारिक सामाजिक सञ्जाल प्लेटफर्महरू मार्फत नयाँ एड्भेन्चर स्कुटरको आगमनबारे जानकारी सार्वजनिक गरिसकेको छ। अत्यन्तै आकर्षक र स्पोर्टी म्याक्सी डिजाइनमा तयार पारिएको जुम १६० मा १५६ सीसी क्षमताको लिक्विड-कुल्ड, फोर-भल्भ, सिंगल-सिलिन्डर, एसओएचसी, फ्युल इन्जेक्टेड (एफआई) इन्जिन जडान गरिएको छ। शक्तिशाली प्रदर्शनका लागि परिचित यो इन्जिनले अधिकतम ८००० आरपीएममा १४.६ बीएचपी पावर तथा ६५०० आरपीएममा १४ एनएम टर्क उत्पादन गर्छ।

लामो यात्रा र अफरोड राइडलाई समेत ध्यानमा राखेर निर्माण गरिएको यस स्कुटरमा हिरोको इन्धन बचत गर्ने प्रविधि आई३एस (i3S) साइलेन्ट स्टार्ट सिस्टम समावेश छ। आधुनिक फिचरका रूपमा यसमा डुअल चेम्बर एलईडी हेडलाइट सेटअप, फुल्ली डिजिटल इन्स्ट्रुमेन्ट ड्यासबोर्ड, ब्लुटुथ कनेक्टिभिटी, टर्न-बाई-टर्न (TBT) नेभिगेसन, स्मार्ट की, सीभीटी ट्रान्समिसन, डिस्क ब्रेक, एबीएस र मोबाइल चार्जिङ पोर्ट उपलब्ध गराइएको छ।

उकालो-ओरालो र कच्ची सडकमा सहज यात्राका लागि यसको अगाडि टेलिस्कोपिक हाइड्रोलिक सक अब्जर्बर र पछाडि ट्वीन सक अब्जर्बर सस्पेन्सन सेटअप रहेको छ। यसका साथै १४ इन्चको ठूलो अलोय ह्वील, डुअल पर्पस ट्युबलेस टायर, रिमोट कि बाट खुल्ने सिट, अग्लो विन्डसिल्ड र टुरिङ एसेसरिज सेटअपले यसलाई प्रिमियम एड्भेन्चर लुक्स प्रदान गरेका छन्। नेपाली प्रिमियम स्कुटर बजारमा यसको आगमनले अन्य प्रतिस्पर्धी ब्रान्डहरूलाई कडा चुनौती दिने अपेक्षा गरिएको छ।