काठमाडौँ । जीवन बीमाको क्षेत्रमा लामो समयदेखि सक्रिय लाइफ इन्स्योरेन्स कर्पाेरेशन (एलआईसी नेपाल) ले गत आर्थिक वर्ष २०८२/८३ को वित्तीय विवरण सार्वजनिक गर्दै उत्साहजनक प्रगति हासिल गरेको देखाएको छ। कम्पनीले यस अवधिमा आफ्नो खुद नाफामा उल्लेखनीय वृद्धि गरेको छ।

अघिल्लो आर्थिक वर्षमा ३१ करोड ५८ लाख ९३ हजार रुपैयाँ खुद नाफा कमाएको यस कम्पनीले समीक्षा वर्षमा भने त्यसलाई बढाएर ४० करोड ५७ लाख ७७ हजार रुपैयाँ पुर्‍याएको छ।

प्रतिशतको हिसाबले हेर्दा यो २८.४५ प्रतिशतको सबल वृद्धि हो। बीमा बजारमा देखिएका विभिन्न प्रतिस्पर्धा र समग्र आर्थिक गतिविधीमा देखिएको सुस्तताबिच एलआईसी नेपालले आफ्नो नाफा यो बिन्दुमा पुर्‍याउनुलाई सकारात्मक रूपमा हेरिएको छ।

कम्पनीको मुख्य आम्दानीको स्रोत मानिने खुद बीमा शुल्क आर्जनमा पनि राम्रो सुधार देखिएको छ। गत वर्ष कम्पनीले कुल २१ अर्ब १४ करोड ५४ लाख १९ हजार रुपैयाँ बराबरको खुद बीमा शुल्क आर्जन गर्‍यो।

जब कि, यसअघिको वर्ष यस्तो आर्जन १९ अर्ब ८२ करोड ६८ लाख ८५ हजार रुपैयाँमा सीमित थियो। व्यवसायको दायरा फराकिलो बन्दै जाँदा आम्दानी र खर्चको ब्यालेन्स पनि त्यसैअनुसार मिलाइएको छ। गत वर्ष कम्पनीले कुल ३३ अर्ब ४६ करोडभन्दा बढी आम्दानी गर्दा कुल खर्च ३० अर्ब ६८ करोड रुपैयाँभन्दा केही बढी हुन पुग्यो।

अघिल्लो वर्ष भने ३२ अर्ब ३३ करोड आम्दानी गरी २९ अर्ब ५५ करोड रुपैयाँ खर्च भएको थियो।

साधारण अर्थमा भन्दा, बीमा कम्पनीको जीवन बीमा कोष भनेको भोलि संकट पर्दा बीमितलाई दाबी भुक्तानी दिन जम्मा गरिएको बलियो ढुकुटी हो। यही मुख्य कोषमा एलआईसी नेपालले निकै ठूलो छलाङ मारेको छ। अघिल्लो वर्ष १ खर्ब ३२ अर्ब ९२ करोड रुपैयाँ रहेको यो कोष बढेर गत वर्ष १ खर्ब ४६ अर्ब ८१ करोड रुपैयाँको उचाइमा पुगेको छ।

यसले कम्पनीसँग भविष्यमा आइपर्ने ठूला दाबीहरू भुक्तानी गर्न सक्ने उच्च क्षमता रहेको प्रस्ट्याउँछ। यसका साथै, पाँच अर्ब ५० करोड रुपैयाँ चुक्ता पुँजी रहेको यस संस्थाले सम्भावित जोखिमको सुरक्षाका लागि महाविपत्ति कोषमा पनि ७७ करोड ३५ लाख ५४ हजार रुपैयाँ जगेडा राखेको छ।

समग्र वित्तीय सूचकहरूलाई केलाउँदा कम्पनीको प्रतिसेयर आम्दानी ७.३८ रुपैयाँ र प्रतिसेयर नेटवर्थ १७७.८७ रुपैयाँ कायम भएको विवरणमा उल्लेख छ।