काठमाडौं। नेपाल लाइफ इन्स्योरेन्स कम्पनी लिमिटेडले आफ्नो २५ वर्षको गौरवमय यात्राको अवसरमा रु. १३ अर्बभन्दा बढी प्रथम बीमा शुल्क आर्जन गर्दै नेपालको जीवन बीमा उद्योगमा नयाँ ऐतिहासिक कीर्तिमान कायम गरेको छ।

कम्पनीका अनुसार नेपालको जीवन बीमा इतिहासमा पहिलो पटक कुनै जीवन बीमा कम्पनीले १३ अर्बभन्दा बढी प्रथम बीमा शुल्क आर्जन गरेको हो। यसअघि गत आर्थिक वर्षमा कम्पनीले १० अर्ब रुपैयाँ प्रथम बीमा शुल्क आर्जन गर्दै कीर्तिमान बनाएको थियो।

यस उपलब्धिलाई कम्पनीले आफ्नो २५ वर्षको विश्वास, सेवा र उत्कृष्टताको यात्राको महत्वपूर्ण उपलब्धिका रूपमा लिएको छ। कम्पनीले यो सफलताले नेपाली जीवन बीमा उद्योगमा नयाँ मानक स्थापित गरेको जनाएको छ।

ऐतिहासिक उपलब्धिको अवसरमा कम्पनीका प्रमुख कार्यकारी अधिकृत प्रवीण रमण पराजुलीले सञ्चालक समिति, बीमित, बीमा अभिकर्ता, कर्मचारी, शेयरधनी, नियामक निकाय तथा प्रत्यक्ष–अप्रत्यक्ष रूपमा सहयोग गर्ने सम्पूर्ण सरोकारवालाप्रति आभार व्यक्त गरेका छन्।

कम्पनीले आगामी दिनमा प्रविधिमैत्री र ग्राहकमैत्री सेवा विस्तार, नवीन बीमा योजना, प्रभावकारी लगानी व्यवस्थापन, कर्मचारी तथा अभिकर्ताको क्षमता अभिवृद्धि र विश्वस्तरीय बीमा सेवा प्रदान गर्दै अग्रणी भूमिका कायम राख्ने प्रतिबद्धता पनि जनाएको छ।

नेपाल लाइफले ‘२५ वर्षको विश्वास, आज १३ अर्बको ऐतिहासिक उपलब्धि’ सम्पूर्ण ग्राहक, अभिकर्ता, कर्मचारी, शेयरधनी तथा सरोकारवालाको साझा सफलताको प्रतिफल भएको उल्लेख गर्दै आगामी दिनमा पनि नेपाली जीवन बीमा क्षेत्रको अग्रणी संस्थाका रूपमा नयाँ–नयाँ उपलब्धि हासिल गर्दै अघि बढ्ने विश्वास व्यक्त गरेको छ।