काठमाडौँ । नेपाल लाइफ इन्स्योरेन्स कम्पनी लिमिटेडले नेपालमा फिफा विश्वकप २०२६ को प्रसारणका लागि हिमालय स्पोर्ट्ससँग सह–प्रायोजकका रूपमा सहकार्य गरेको छ। यस सहकार्यअन्तर्गत विश्वकपका खेलहरू हिमालय स्पोर्ट्स टिभी तथा DIGO App मार्फत प्रसारण हुँदा नेपाल लाइफ पनि आधिकारिक सह–प्रायोजकका रूपमा सहभागी रहनेछ।

नेपाल लाइफ इन्स्योरेन्सका प्रमुख कार्यकारी अधिकृत प्रवीण रमण पराजुलीले विश्वकै सर्वाधिक लोकप्रिय खेल महोत्सव फिफा विश्वकप २०२६ को प्रसारणमा हिमालय स्पोर्ट्ससँग सहकार्य गर्न पाउँदा कम्पनी गौरवान्वित भएको बताउनुभयो।

उहाँले विश्वभरका अर्बौं दर्शकको आकर्षणको केन्द्र बन्ने फिफा विश्वकपले खेलकुदमार्फत मानिसहरूलाई एकताबद्ध गर्ने उल्लेख गर्दै यस ऐतिहासिक प्रतियोगितासँग आफ्नो उपस्थिति जोड्न पाउनु नेपाल लाइफका लागि गर्वको विषय भएको बताउनुभयो।

पराजुलीका अनुसार उक्त सहकार्यले नेपाली दर्शकलाई विश्वकपको रोमाञ्च अझ नजिकबाट अनुभव गराउन मद्दत गर्नेछ। साथै, नेपाल लाइफको ब्रान्डलाई देशभरका खेलप्रेमीसँग थप प्रभावकारी रूपमा जोड्ने विश्वास कम्पनीले लिएको छ।