कोरोना बीमाको दावी भुक्तानी आजबाट हुनेः पहिलो चरणमा क- कसले पाउँदैछन् ?
रोकिएको कोरोना बीमाको दावी भुक्तानीका लागि सरकारले १ अर्ब रुपैयाँ नेपाल बीमक संघको खातामा पठाइसकेको छ
वि.सं.२०७९ मंसिर १३ मंगलवार
काठमाडौं । लामो समयदेखि रोकिएको कोरोना बीमाको दावी भुक्तानी आजबाट हुने भएको छ ।
आजदेखि बीमा कम्पनीहरुले कोरोना बीमाको दावी भुक्तानी गर्ने भएका हुन् ।
गत मंसिर ६ गते बीमा प्राधिकरणका अध्यक्ष सूर्यप्रसाद सिलवालको रोहबरमा बसेको बैठकमा मंगलबारदेखि दावी रकम भुक्तानी गर्ने निर्णय भएको थियो ।
कोरोना बीमाको दावी भुक्तानी हुँन बाँकी रकममध्ये आज १ अर्ब ८१ करोड रुपैयाँ भुक्तानी हुनेछ ।
भुक्तानीको प्राथमिकतामा व्यक्ति तथा परिवारलाई दिइएकाले सोही बमोजिम हुने नेपाल बीमा संघले जनाएको छ ।
सरकारबाट आएको १ अर्ब लाई ५५ प्रतिशत मानेर बाँकी ४५ प्रतिशत (८१ करोड ८१ लाख) बीमा समिति, नेपाल पुनर्बीमा कम्पनी र निर्जीवन बीमा कम्पीले थप गरेर कुल १ अर्ब ८१ करोड ८१ लाख भुक्तानी गर्ने मोडालिटि बनेको थियो।
मोडालिटी अनुसार ४५ प्रतिशतमा बीमा समितिले ८ प्रतिशत, नेपाल पुनर्बीमा कम्पनीले १२ प्रतिशत र बीमा कम्पनीहरुले २५ प्रतिशत रकम थप्ने भन्ने थियो ।
लामो समयदेखि रोकिएको कोरोना बीमाको दावी भुक्तानीका लागि केही समय अगाडि सरकारले १ अर्ब रुपैयाँ निकासा गरेको थियो ।
सो रकम नेपाल बीमक संघको खातामा पठाइसकेको छ ।
सरकारले कोरोना बीमा बापत अनुदान रकम २ करोड ३ लाख ६४ हजार ११६ रुपैयाँ समेत गरि कुल १२ अर्ब ३ करोड २५ लाख ३५ हजार ६७० रुपैयाँ भुक्तानी गर्न बाँकी रहेको छ ।
प्रकाशित समय : १२:१८ बजे