काठमाडौं । कुमारी बैंक लिमिटेडले चालु आर्थिक वर्षको तेस्रो त्रैमाससम्म आउँदा आफ्ना आर्थिक सूचकहरुमा छलाङ मारेको देखिएको छ । यो तेस्रो त्रैमासमा बैंकले १ अर्ब ८० करोड ८४ लाख रुपैयाँ खुद नाफा आर्जन गरेको छ । जुन गत वर्षको तुलनामा ७८ दशमलव ५८ प्रतिशतले बढी हो । बैंकले गत आर्थिक बर्षको सोहि अवधिमा १ अर्ब १ करोड २७ लाख रुपैयाँ आर्जन गरेको थियो ।
बैंकले समिक्षा अवधिमा वितरणयोग्य मुनाफामा पनि छलाङ हानेको छ । अर्थात गत वर्षको तुलनामा २०८५ दशमलव १५ प्रतिशतले आफ्नो वितरण योग्य नाफा बढाएको छ । अहिले बैंकको वितरण योग्य मुनाफा ९८ करोड ४६ लाख रुपैयाँ रहेको छ । गत आर्थिक बर्षको यस अवधिमा ४ करोड ५० लाख रुपैयाँ वितरण योग्य मुनाफा आर्जन गरेको थियो ।

बैंकले समिक्षा अवधिमा खुद ब्याज आम्दानी ३९.०४ प्रतिशत बढेर ३ अर्ब ८२ करोड २७ लाख रुपैयाँ, खुद फि तथा कमिशन आम्दानी ४३.६४ प्रतिशत बढेर ५८ करोड ४८ लाख रुपैयाँ रहेको छ । त्यस्तै, यस अवधिमा बैंकको अन्य सञ्चालन आम्दानी साढे ७ करोडबाट बढेर करिब ३२ करोड रुपैयाँ पुगेको छ । त्यस्तै, यस अवधिमा बैंकको सञ्चालन मुनाफा ७४.४१ प्रतिशत बढेर २ अर्ब ५९ करोढ रुपैयाँ रहेको छ ।

बैंकको प्रतिशेयर आम्दानी ३ रुपैयाँ २४ पैसा बढेर १७ रुपैयाँ ३४ पैसा पुगेको छ । बैंकको मूल्य आम्दानी अनुपात १८.८८ गुणा रहेको छ भने प्रतिशेयर नेटवर्थ १३५ रुपैयाँ ४९ पैसा रहेको छ ।

गत आर्थिक वर्षको अन्त्यको तुलनामा चालु आर्थिक वर्षको सोही अवधिसम्ममा बैंकको चुक्ता पूँजी १०.८५ प्रतिशत बढेर १३ अर्ब ८७ करोड ८४ लाख रुपैयाँ, जगेडा कोष ३.७३ प्रतिशत बढेर ४ अर्ब ९२ करोड ५० लाख रुपैयाँ, बैंकको निक्षेप ९।५७ प्रतिशत बढेर १ खर्ब २७ अर्ब ६९ करोड रुपैयाँ र कर्जा १६।५५ प्रतिशत बढेर १ खर्ब २९ अर्ब रुपैयाँ पुगेको छ ।