काठमाडौँ । नेपाल उद्योग वाणिज्य महासंघका अध्यक्ष शेखर गोल्छाले फ्रान्सेली लगानीकर्ताहरूलाई नेपालमा लगानी गर्न आग्रह गरेका छन् । नेपाल–फ्रान्स व्यवसायिक मञ्चको भर्चुअल बैठकलाई  संबोधन गर्दै अध्यक्ष गोल्छाले नेपाल लगानी भित्र्याउन तयार रहेको बताएका हुन्।

गोल्छाले आर्थिक विकास र समृद्धिको मार्गमा मुलुक अगाडि बढीसकेको भन्दै गोल्छाले पूर्वाधार विकास, पर्यटन, अर्थतन्त्रको डिजिटलाईजेशन र कृषि प्रशोधन उद्योगमा लगानीको ठूलो सम्भावना रहेको बताउँदै यी क्षेत्रमा लगानी गर्न फ्रान्सेली लगानीकर्तालाई आग्रह गरे ।

अध्यक्ष गोल्छाले महासंघले अगाडि बढाएको राष्ट्रिय आर्थिक रूपान्तरण रणनीति २०३० का विषयमा पनि विदेशी लगानीकर्तालाई जानकारी गराएका छन् । उक्त रणनीतिमा अर्थतन्त्रको आकार १ सय अर्ब अमेरिकी डलर पुर्याउने, थप २३ लाख रोजगारी सिर्जना गर्ने, अर्थतन्त्रसंग व्यापार घाटाको अनुपात आधा घटाउने लक्ष्य राखिएको छ ।

हालसम्म फ्रान्सबाट एक सय ७ परियोजनामा करिब १ अर्ब रुपैयाको लगानी प्रतिवद्धता आएको छ । व्यापार तथा निकासी प्रवद्र्धन केन्द्रका अनुसार गत बर्ष फ्रान्ससंगको व्यापार घाटा करिब साढे ८ अर्ब रुपैया थियो ।

नेपाल उद्योग वाणिज्य महासंघ र फ्रान्सको मेडेफ इन्टरनेशनलले संयुक्त रुपमा आयोजना गरेको उक्त कार्यक्रमलाई काठमाडौंस्थित फान्सेली दुतावास र पेरिसस्थित नेपाली दुतावासको सहयोग रहेको थियो । बैठकमा दुवै देशबाट ५० जना उद्यमी व्यवसायीहरूको सहभागिता रहेको महासंघका उपमहासचिव गोकर्ण अवस्थीले जनाकारी दिए ।

बैठकमा दुवै देशबाट विमानस्थल इन्जिनियरिङ, निर्माण, डिजिटल सुरक्षा, बैकिङ, शिक्षा, स्वास्थ्य, कृषि, पर्यटन, ऊर्जा, खाद्य प्रशोधन, अटोमोवाइल्स, रेमिटेन्स लगायतका क्षेत्रबाट प्रतिनिधित्व रहेको थियो ।

२०७८ असार २५ गते प्रकाशित