काठमाडौं । सूचीकृत ५१ लघुवित्त वित्तीय संस्थामध्ये हालसम्म जम्मा आठले लाभांश घोषणा गरेका छन् । गत वर्ष धेरै लघुवित्तहरूले लाभांश घोषणा गर्न सकेका थिएनन् । लघुवित्तहरूमा भएको समस्याका कारण केहीले मात्रै लाभांश दिने क्षमता देखाएका थिए ।

चालु आर्थिक वर्षमा भने अघिल्लो आर्थिक वर्षको नाफाबाट आठ लघुवित्तले लाभांश घोषणा गरेका हुन् । यसमा आशा, गुराँस, फरवार्ड, स्वाबलम्बन, आरएसडीसी, सर्पोट, नेशनल र फर्स्ट लघुवित्त छन् । अहिले लघुवित्तहरूले १५ प्रतिशतभन्दा बढी लाभांश घोषणा गर्न पाउँदैनन् । केही वर्ष अघिसम्म लघुवित्तहरूले ७५ प्रतिशतसम्म लाभांश दिने गरेका थिए । लघुवित्तमा समस्या निम्तिँदै गएपछि राष्ट्र बैंकले कडाइ गरी लाभांशमा १५ प्रतिशतको सीमा तोकिदिएको हो ।

आशा लघुवित्त : आशा लघुवित्तले गत आर्थिक वर्षको मुनाफाबाट १५ प्रतिशत लाभांश घोषणा गरेको छ । लघुवित्तले अघिल्लो वर्ष कमाएको नाफाबाट आफ्ना शेयरधनीहरूलाई लाभांश दिने भएको हो।लघुवित्तको संचालक समितिको बैठकले शेयरधनीहरूलाई १४.२५ प्रतिशत बोनस शेयर र कर प्रयोजनका लागि ०.७५ प्रतिशत नगद गरी जम्मा १५ प्रतिशत दिने निणर्य गरेको हो ।

गुराँस लघुवित्त : गुराँस लघुवित्तले पनि यस पटक १५ प्रतिशत नै लाभांश घोषणा गरेको छ । कम्पनीको भदौ २४ गते बसेको बैठकले आफ्ना शेयरधनीहरूलाई गत वर्षको मुनाफाबाट लाभांश दिने निणर्य गरेको हो ।

लघुवित्तले १४.२५ प्रतिशत बोनस र ०.२५ प्रतिशत नगद गरी कुल १५ प्रतिशत लाभांश दिने निणर्य गरेको हो ।

फरवार्ड लघुवित्त : फरवार्ड लघुवित्तको सञ्चालक समिति बैठकले १३.३ प्रतिशत बोनस शेयर र कर प्रयोजनका लागि ०.७ नगद लाभांश गरी कुल १४ प्रतिशत दिने निणर्य गरेको छ ।

स्वाबलम्वन लघुवित्त : स्वाबलम्वन लघुवित्तले १५ प्रतिशत लाभांश दिने घोषणा गरेको छ । कम्पनीको संचालक समितिको बैंठकले शेयरधनीहरूलाई उक्त लाभांश दिने निणर्य गरेको हो ।

उक्त लाभांशमा १४.२५ प्रतिशत बोनस शेयर र ०.७५ प्रतिशत कर प्रयोजनका लागि नगद लाभांश दिने प्रस्ताव छ ।

आरएसडीसी लघुवित्त : आरएसडीसी लघुवित्त वित्तीय संस्था लिमिटेडले गत आर्थिक वर्षको मुनाफाबाट शेयरधनीहरूलाई हाल कायम चुक्ता पुँजीको ९.५० प्रतिशतका दरले बोनस शेयर र सोको कर प्रयोजनार्थ ०.५० प्रतिशतका दरले नगद लाभांश वितरण गर्ने घोषणा गरेको छ । कात्तिक एक गते बसेको लघुवित्तको सञ्चालक समितिको बैठकले सो दरमा लाभांश वितरण गर्ने निर्णय गरेको हो ।

सर्पोट लघुवित्त : सर्पोट लघुवित्त वित्तीय संस्थाले १४.५० प्रतिशत लाभांश दिने भएको छ । कम्पनी संचालक समितिको बैंठकले गत आर्थिक वर्षको मुनाफाबाट १३.७७ प्रतिशत बोनस शेयर र ०.७२ प्रतिशत कर प्रयोनका लागि नगद लाभांश दिने निणर्य गरेको हो ।

उक्त लाभांश शेयरधनीहरूले राष्ट्र बैंकबाट स्वीकृत भएर साधारणसभाबाट पारित भएपछि मात्रै प्राप्त गर्नेछन् ।

नेशनल लघुवित्त : नेशनल लघुवित्त वित्तीय संस्था लिमिटेडले गत आर्थिक वर्षको मुनाफाबाट शेयरधनीहरूलाई हाल कायम चुक्ता पुँजीको १५ प्रतिशतका दरले लाभांश वितरण गर्ने घोषणा गरेको छ ।जसमध्ये १४.२५ प्रतिशत बोनस शेयर र ०.७५ प्रतिशत कर प्रयोजनार्थ नगद लाभांश रहेको छ ।

फर्स्ट माइक्रोफाइनान्स : फर्स्ट माइक्रोफाइनान्स लघुवित्त वित्तीय संस्थाको सञ्चालक समिति बैठकले ९.४७ प्रतिशत लाभांश वितरण गर्ने प्रस्ताव गरिसकेको छ ।

लघुवित्तले गत आर्थिक वर्षको मुनाफाबाट आफ्ना शेयरधनीलाई नौ प्रतिशत बोनस शेयर र ०.५७ प्रतिशत नगर गरी कुल ९.४७ प्रतिशत लाभांश दिने प्रस्ताव गरेको हो ।