काठमाडौं। काठमाडौं महानगरपालिकाको मेयरमा सत्ता गठबन्धनकी साझा उम्मेदवार सिर्जना सिंहले आजबाट घरदैलो कार्यक्रम सुरु गरेकी छन्। मतदातालाई आफ्नो भिजन र योजना सुनाउन उनी घरदैलोमा निस्किएकी हुन्।

२७ वर्षपछि मेयर उम्मेदवार बनेर पुन: सक्रिय राजनीतिमा फर्किएकी सिर्जनालाई नेपाली कांग्रेसकी केन्द्रीय सदस्य एवं प्रधानमन्त्रीपत्नी आरजु राणा देउवाले शुभकामना दिएकी छन्। सिर्जनालाई साथ दिन आरजु मंगलबार उनको निवास चाक्सीबारी पुगेकी थिइन्।

चाक्सीबारीमा आरजुले चुनावी अभियान प्रभावकारी बनाउने सुझाव पनि दिइन्। चुनावी सभामा मात्र नअल्झिन र मतदाताको घरघरमा पुगेर मत माग्न आरजुले सुझाइन्।

महिलाहरु राजनीतिमा आउनुपर्ने सार्वजनिक आह्वान गर्ने आरजुले सिर्जनालाई टिकट दिलाउन सभापतिसमेत रहेका पति शेरबहादुर देउवासँग भूमिका खेलेको बताइन्छ। कांग्रेसको घरानाको प्रतिनिधित्व गर्ने सिर्जना र आरजु मिल्ने साथी हुन्।

पार्टीमा टिकट दिलाउन आफ्नो हिसाबले भूमिका खेलेकी आरजुले सिर्जनालाई महानगरमा निर्वाचित गराउन साथ समर्थन जनाएकी छन्।