काठमाडौँ । साताको तेस्रो कारोबार दिन आज दुई कम्पनीको सेयर मूल्यमा अस्वभाविक वृद्धि देखिएको छ । सेयर बजारको मापन गर्ने नेप्से परिसूचकमा आज लक्ष्मी उन्नती कोष र लक्ष्मी ईक्वीडीटि फण्डमा अस्वाभाविक वृद्धि देखिएको छ ।

यी दुवै कम्पनीको सेयर मूल्यमा एक दिनमा बढ्न पाउने निर्धारीत सिमा भन्दा बढी दरले मूल्य बढेको देखिएको हो । नेप्सेका अनुसार लक्ष्मी उन्नती कोषको सेयर मूल्यमा १०.४ प्रतिशतले बढेको छ भने यता लक्ष्मी इक्वीडिटीको सेयर मूल्य पनि १०.१ प्रतिशतले बढेको देखिएको छ । जबकि इन्ट्रा डे कारोबारमा कम्पनीको मूल्य १० प्रतिशत भन्दा बढी वृद्धि वा गिरावट हुन पाउँदैन । अर्थात कुनै पनि कम्पनीको सेयर मूल्य १० प्रतिशतले घट्यो वा बढ्यो भने त्यो दिन उक्त कम्पनीको कारोबार दिनभरीकै लागि स्थगित हुने नियम छ ।

यस सम्बन्धमा नेप्सेका प्रवक्ता मुराहरी पराजुलीले प्राविधिक त्रुटिका कारण यस्तो देखिन सक्ने बताउँदै सच्चाउने बताए । उनले भने ‘कम्पनीको सेयर मूल्य १० प्रतिशत बढेपछि सर्किट लागेर कारोबा बन्द हुन्छ, प्राविधिक त्रुटिका कारण यी दुई कम्पनीको मूल्य वृद्धिदर १० प्रतिशत भन्दा बढी देखिएको छ । हामीले कहाँ नेर त्रुटि भयो हेरेर सच्चाउँछौँ’

२०७८ असार ५ गते प्रकाशित