काठमाडौँ । साउन १ गतेदेखि सेयर बजारमा अल्पकालिन र दीर्घकालीन लगानीकर्तालाई छुट्टाछुट्टै लाभकर लाग्ने भएको छ । सरकारले र्दीघकालिन लगानीर्तालाई कम र अल्पकालीन लगानीकर्ताका लागि बढी कर लगाउन लागेको हो । अल्पकालिन लगानीकर्ताको कारण बजार हावी हुने देखिएपछि नियन्त्रण गर्न सरकारले यस्तो व्यावस्था गर्न लागेको हो । स्रोतका अनुसार साउन १ गतेबाट सोही लाभकर कार्यान्वयनमा आउन लागेको हो ।

सरकारले आगामी आर्थिक वर्षबाट अल्पकालिन र दिर्धकालिन लगानीकर्ता छुट्टायर सोही अनुसार कर लगाउने भनेपछि सिडिएससी सोही अनुरुप सिस्टम बनाउन सुरु गरेको हो ।

अर्थमन्त्री बिष्णु पौडेलले आगामी आवको बजेटमा आयकर ऐन संशोधन गर्दै एकवर्ष कम अवधीमा सेयर बेच्ने लगानीकर्तालाई ७।५ प्रतिशत पूँजीगत कर लगाउने र एकवर्षभन्दा बढी समय पछि मात्रै सेयर बेच्नेलाई ५ प्रतिशत पूँजीगत लाभकर लगाउने नीति लिएको छ । त्यसको लागि अहिले सिडिएससीले सिस्टम बनाउने काम गरिरहेको बताइएको छ ।

अहिलेसम्म प्राकृतिक व्यक्तिले ५ प्रतिशत पुँजीगत लाभकर तिरी रहेका छन् । अब साउन १ गतेदेखि ३६५ दिन भन्दा अघि सेयर बिक्री गरेमा ७.५ प्रतिशत र ३६५ दिन भन्दापछि सेयर बिक्री गरेमा ५ प्रतिशत कर लाग्ने छ ।

लगानीकर्ताले आफूले किनेको सेयरको अवधि छुट्याउने फिचर्स मेरो सेयर उपलब्ध हुने गराउने गरि सिडिएससीले काम गरिरहेको  प्रवक्ता सुरेश न्यौपानेले बताए । साउन १ गतेदेखिको कारोबारबाट यो व्यवस्था लागु हुने तयारी भएको उनले बताए ।

२०७८ असार २१ गते प्रकाशित