काठमाडौँ । आगामी आर्थिक वर्षको बजेटमा साना लगानीका संचारमाध्यमलाई सम्बोधन गर्न नसकेको भन्दै नेपाल पत्रकार महासंघ काठमाडौँ शाखाले सरकारलाई ध्यानाकर्षण गरेको छ । महासंघको काठमाडौँ शाखाले आज एक विज्ञप्ति जारी गर्दै बजेटमार्फत सरकारले नेपाली संचार क्षेत्रका मुद्दालाई सम्बोधन गर्ने प्रयास गरेपनि यो प्रयास अझै अपूर्ण र विभेद्कारी छ रहेको भन्दै आपत्ति जनाएको हो ।

सरकारले सार्वजनिक गरेको वजेटमा प्रजातन्त्र, लोकतन्त्र र गणतन्त्र स्थापनाका लागि महत्वपूर्ण भूमिका निर्वाह गरेका र ती कालखण्डमा नागरिकलाई सुसूचित र सचेत गराउँदै समाज परिवर्तनका पक्षमा शशक्त रुपमा लागि परेका साना लगानीका पत्रपत्रीका तथा स्वरोजगारमुलक संचारमाध्यमका लागि बजेटले कुनै सम्बोधन नै नगरेको महासंघको ठहर रहेको छ ।

विज्ञप्तिमा ‘लोकतन्त्र, शान्ति, स्थिरता र परिवर्तनका पक्षमा उभिएका र उभिदैं आएका यस्ता साना लगानीका स्वरोजगारमूलक संचारमाध्यमलाई बेवास्ता गरेर अघि बढ्न खोज्नु सरकारको गम्भीर कमजोरी हो । कोभिड–१९ को महामारीका कारण गम्भीर संकट खेपीरहेका यस्ता संचारमाध्यमको संरक्षणका लागि बजेटमार्फत कुनै पनि व्यवस्था नगर्नुले यी क्षेत्रमा कार्यरत संचारकर्मीहरुलाई थप निराश बनाएको छ । सरकारी तवरबाट योजनावद्ध रुपमा चालिएको यो कदम सच्याउन हामी सरकारसँग विशेष आग्रह गर्दछौं । सरकारसँग यस्ता साना लगानीका सञ्चारमाध्यमहरुको संरक्षण तथा प्रवद्र्घनका लागि ठोस योजना ल्याउन पनि हामी विनम्रतापूर्वक आग्रह गर्दछौं ।’ भनि उल्लेख गरिएको छ ।

यसैगरी लोककल्याणकारी विज्ञापन वापत उपलब्ध गराइने रकमको १० प्रतिशत रकम पत्रकार कल्याणकारी कोषमा जम्मा गर्ने व्यवस्थाका विषयमा साना तथा स्वरोजगारमूलक संचार माध्यमका हकमा पुर्नविचार गर्न र प्रदेश सरकार र स्थानीय तहलाई पनि आगामी आर्थिक वर्षको बजेट विनियोजन गर्दा साना लगानीका संचारमाध्यमको संरक्षण र प्रवद्र्घनका लागि विशेष राहत प्याकेज घोषणा गर्न समेत महासंघले आग्रह गरेको छ ।

२०७८ जेठ १६ गते प्रकाशित