मेरो माइक्रोफाइनान्सको नाफामा छलाङ, १४५.५१ प्रतिशतले बढ्यो

वि.सं.२०७८ साउन १८ सोमवार

काठमाडौँ । गत आर्थिक वर्षको चौथो त्रैमासमा मेरो माइक्रोफाइनान्स लघुवित्त वित्तीय संस्था लिमिटेडको वित्तिय प्रगतिमा छलाङ आएको छ ।
कम्पनीले आज सार्वजनिक गरेको चौथो त्रैमास वित्तीय विवरणअनुसार समीक्षा अवधिमा संस्थाले ४४ करोड ७२ लाख रुपैयाँ नाफा आर्जन गर्न सफल भएको छ। यो अघिल्लो वर्षको यही अवधिको तुलनामा १४५.५१ प्रतिशतले बढी हो। अघिल्लो वर्ष यही अवधिमा संस्थाले १८ करोड २१ लाख रुपैयाँमात्र नाफा आर्जन गरेको थियो।
समीक्षा अवधिमा संस्थाको सञ्चालन मुनाफा १०२.५२ प्रतिशतले बढेर ५९ करोड ५ लाख रुपैयाँ पुगेको छ। अघिल्लो वर्ष यस्तो मुनाफा २९ करोड १५ लाख रुपैयाँमा सीमित थियो।
संस्थाको खुद ब्याज आम्दानी ९० करोड १० लाख रुपैयाँ छ। जुन अघिल्लो वर्षको तुलनामा ७२.४६ प्रतिशतले बढी हो। अघिल्लो वर्ष यस्तो आम्दानी ५२ करोड २४ लाख रुपैयाँ थियो।
समीक्षा अवधिमा संस्थाले १० अर्ब ५ करोड रुपैयाँ सापटी लिई १३ अर्ब ६४ करोड रुपैयाँ कर्जा परिचालन गरेको छ। अघिल्लो वर्ष ३ अर्ब ९४ करोड रुपैयाँ सापटी लिई ५ अर्ब ७७ करोड रुपैयाँ कर्जा परिचालन गरेको थियो।
संस्थाको रिजर्भको आकार २०१.९७ प्रतिशतले उकालो लागेको छ। अघिल्लो वर्ष २० करोड ९० लाख रुपैयाँ रहेको रिजर्भमा बढेर ६३ करोड १२ लाख रुपैयाँ पुगेको छ।
चुक्तापुँजी १ अर्ब रुपैयाँ रहेको संस्थाको वार्षिकीकरण प्रतिसेयर आम्दानी (ईपीएस) बढेर ४७.७२ रुपैयाँ पुगेको छ। अघिल्लो वर्ष ईपीएस १८.२२ रुपैयाँ रहेको थियो।
पीई रेसियो ३४.५७ गुणा रहेको संस्थाको प्रतिसेयर नेटवर्थ १६३.१२ रुपैयाँ रहेको छ।
२०७८ साउन १८ गते प्रकाशित

प्रकाशित समय : ०६:३१ बजे