काठमाडौँ । सरकारले सम्झौता अनुसार काम गर्ने १५ कम्पनी तथा व्यावसायीलाई कालो सूचीमा राखेको छ । सार्वजनिक खरीद अुनगमन कार्यालयले ४ कम्पनीलाई २ वर्ष र ११ कम्पनीलाई १ वर्षका लागि कालोसूचीमा राखेको हो ।

आजदेखि लागू हुनेगरि प्रहरी प्रधान कार्यालयको सिफारिशका आधारमा पूजा ट्रेडिङ एण्ड अर्डर सप्लायर्स हेटौँडा तथा डिएमएस बुट इण्डष्ट्रिज बूढानीलकण्ठ, कृषि सामग्री कम्पनी लिमिटेडका सिफारिशमा सैलुङ इन्टरप्राइजेज र मुक्तिनाथ कृषि सामग्री कम्पनीलाई दुई वर्षका लागि कालोसूचीमा सिफारिस गरिएको हो ।

फ्रेण्ड्स अर्बिट कन्स्ट्रक्सन सर्भिसेज प्रालि कन्काई झापा, हिमालय कन्स्ट्रक्सन प्रालि सङ्खुवासभा, सन्देश सौगात ट्रेड एण्ड सप्लायर्स विराटनगर, चुन फार्मेसी पोखरा, गुरा निर्माण सेवा जुम्ला, अम्बा स्टोर धरान, नीरज स्टिल फर्निचर उद्योग लहानलगायत ११ कम्पनीलाई १ वर्षका लागि कालोसूचीमा राखिएको हो ।

सार्वजनिक खरीद ऐन, २०६३ को दफा ६३ को उपदफा (१०)बमोजिम मङ्सिर १६ गतेदेखि लागू हुने गरी १ वर्षका अवधिसम्म कालोसूचीमा राखिएको हो । कालोसूचीमा परेका कम्पनीले सरकारी निकायको कुनै पनि खरीद तथा निर्माणका कार्यमा भाग लिन पाउने छैनन् । कालोसूचीमा राख्नुभन्दा अगाडि सम्झौता भएका कार्य भने निरन्तर हुनेछन् ।

कालोसूचीमा नेकपा माओवादी केन्द्रका अध्यक्ष पुष्पकमल दाहाल प्रचण्डका घरबेटीको कम्पनी पनि परेको छ । ललितपुर खुमलटारका शारदा प्रसाद अधिकारीको कम्पनी शैलुङ इन्टरप्राइजेज २ वर्षका लागि कालोसूचिमा परेको हो । कम्पनीले आगामी २ वर्षसम्म सरकारी निकायले सार्वजनिक गरेको कुनै पनि बोलपत्रमा सहभागी हुन पाउँदैन ।

२०७८ असार २२ गते प्रकाशित