काठमाडौं । पछिल्लो केही महिनादेखि सोयाविन तेल निर्यात ह्वात्तै बढ्दा नेपालको निर्यात व्यापारमै ठूलो अन्तर देखिएको छ । भारतमा सोयाविन तेलको निर्यात बढ्दा समग्र निर्यात व्यापार नै बढेको हो ।

नेपालले ८ महिनामा १ खर्ब ५८ अर्ब रुपैयाँको सामान निर्यात गर्दा सोयाविन तेल मात्रै ४७ अर्ब ९४ करोड रुपैयाँको निर्यात गरेको हो ।

भारतले सोयाविन तेल आयातमा लाग्ने भन्सार घटाएपछि नेपालको निर्यातको ग्राफ ह्वात्तै बढ्न थालेको हो । चालु आर्थिक बर्षको फागुन मसान्तसम्मको तथ्यांक अनुसार यस अवधिमा नेपालको निर्यात व्यापार मात्रै गत आवको सोही अवधिको तुलनामा ५७.२० प्रतिशतले बढेको छ ।

विभागको तथ्यांकलाई आधार मान्दा गत आर्थिक बर्षको फागुन मसान्तसम्म १ खर्ब ६१ करोड रुपैयाँ बराबरको निर्यात व्यापार गरेको नेपालले चालु आवको सोही अवधिमा बढाएर १ खर्ब ५८ अर्ब १७ करोड रुपैयाँ पुर्याएको छ ।

चालु आवको आठ महिनामा नेपालको आयात व्यापार पनि ११.२० प्रतिशतले बढेको विभागले जानकारी दिएको छ । विभागका अनुसार नेपालले गत आवको पहिलो ८ महिनामा १० खर्ब ३० अर्ब २२ करोड रुपैयाँ बराबरको आयात व्यापार गरेकोमा चालु आवमा आयात बढाएर ११ खर्ब ४५ अर्ब रुपैयाँ पुर्याएको हो । आठ महिनामा सबैभन्दा धेरै आयात हुने वस्तुहरुमा डिजेल, कच्चा सोयाविन तेल, पेट्रोल, एलपीजी ग्याँस प्रमुख रहेका छन् । नेपालले ८ महिनामा कच्चा सोयाविन तेल मात्रै ५१ अर्ब ३५ करोड रुपैयाँको खरिद गरेकाे छ । नेपालले सोही कच्चा तेल प्रशोधन गरेर भारत निर्यात गर्दा नेपालको आयात निर्यातमा वृद्धि देखिएको हो ।

आठ महिनामा नेपालले ७८ अर्ब ८६ करोडको डिजेल, ४२ अर्ब ८० करोडको पेट्रोल तथा ४१ अर्ब रुपैयाँ बराबरको एलपीजी ग्याँस आयात गरेको छ ।

यसरी आयात र निर्यात व्यापारमा उच्च वृद्धि हुँदा नेपालको व्यापार घाटा पनि ६.२२ प्रतिशतले बढ्दै ९ खर्ब ८७ अर्ब ३९ करोड रुपैयाँ पुगेको छ । गत आवको यहि अवधिमा नेपालको व्यापारघाटा ९ खर्ब २९ अर्ब ६० करोड रुपैयाँ थियो ।

कर्पाेरेट बजार

प्रकाशित समय : १८:२९ बजे