काठमाडौं । सार्वजनिक ऋण व्यवस्थापन कार्यालयले दुई अर्ब रुपैयाँ बराबरको नागरिक बचतपत्र तथा ५० करोड रुपैयाँको बैदेशिक रोजगार बचतपत्रको बिक्रीका लागि आह्वान गरेको छ ।

सोमबार बसेको मन्त्रिपरिषद बैठकले नागरिक बचतपत्र र वैदेशिक रोजगार बचतपत्रको अवधि र ब्याजदर निर्धारण गरेको थियो ।

नागरिक बचतपत्र

सार्वजनिक ऋण व्यवस्थापन कार्यालयका अनुसार २ अर्ब रुपैयाँ बराबरको नागरिक बचतपत्रको अवधि पाँच वर्ष र ब्याजदर ७.५ प्रतिशत रहेको छ । सो बचतपत्रमा खरीदका लागि इच्छुक नेपाली नागरिकले यही मंसिर १३ गतेदेखि पुस १४ गतेसम्म आवेदन दिन सक्ने जनाएको छ ।

नागरिक बचतपत्रको ब्याज ६–६ महिनामा भुक्तानी हुनेछ । बचतपत्र खरिदका लागि न्यूनतम आवेदन रकम १० हजार रुपैयाँ निर्धारण गरिएको छ र आवेदन रकमको अधिकतम सीमा कुल निस्कासनको सीमामा नबढाई १० हजारले भाग जाने रकम हुनुपर्नेछ ।

आवेदन प्रक्रिया अनलाइन मार्फत गर्नुपर्नेछ । बचतपत्रको आवेदन फाराम वेबसाइटमा उपलब्ध हुने र आवेदन पोर्टल मार्फत इच्छुक व्यक्तिहरूले आवेदन दिन सक्नेछन् । यस प्रक्रियामा, आवेदन पेश गर्ने व्यक्तिको बैंक खाता प्रमाणित गर्नुपर्नेछ र आवेदनमा आवश्यक कागजातहरु अनलाइन अपलोड गर्नुपर्नेछ। यस बचतपत्रको निस्कासन मिति पुस १६ र परिपक्क हुने अवधि अर्थात् फिर्ता पाउने समय २०८६ पुस १६ गते रहेको छ ।

पचाँस करोडको वैदैशिक रोजगार बचतपत्र

सार्वजनिक ऋण व्यवस्थापन कार्यालयले ५० करोड रुपैयााको वैदेशीक रोजगार बचतपत्रको समेत बिक्री खुला गरेको छ । सो बचतपत्रको अवधि पाँच वर्ष र ब्याजदर ८.५ प्रतिशत रहेको छ । वैदेशीक रोजगार बचतपत्रमा मुलुक बाहिर रोजगारीमा संलग्न वा मुलुक बाहिरको रोजगारीबाट फर्केको ६ महिना नपुगेका नेपाली नागरिकले आवेदन दिन पाउनेछन् । यस्तै गैर(आवासीय नेपालीले आफू वा आफ्नो परिवारको सदस्य (बुबा, आमा, श्रीमान्, श्रीमती, छोरा, छोरी मात्र) को नाममा खरिद गर्नसक्ने कार्यालयले जनाएको छ । यस बचतपत्रमा खरीदका लागि यही मंसिर १३ गतेदेखि पुस १४ गतेसम्म आवेदन दिन सक्ने जनाएको छ ।

बचतपत्र खरिदका लागि न्यूनतम आवेदन रकम १० हजार रुपैयाँ निर्धारण गरिएको छ र आवेदन रकमको अधिकतम सीमा कुल निस्कासनको सीमामा नबढाई १० हजारले भाग जाने रकम हुनुपर्नेछ । यस बचतपत्रको निस्कासन मिति पुस १६ तोकिएको छ भने परिपक्क हुने अवधि अर्थात् फिर्ता पाउने समय २०८६ पुस १६ गते रहेको छ ।

बचतपत्रको आवेदन फाराम वेबसाइटमा उपलब्ध हुने र आवेदन पोर्टल मार्फत इच्छुक व्यक्तिहरूले आवेदन दिन सक्नेछन् । आवेदन प्रक्रिया अनलाइन मार्फत गर्नुपर्नेछ । यस प्रक्रियामा, आवेदन पेश गर्ने व्यक्तिको बैंक खाता प्रमाणित गर्नुपर्नेछ र आवेदनमा आवश्यक कागजातहरु अनलाइन अपलोड गर्नुपर्नेछ।