काठमाडौं । एक महिनामा सरकारी खाताबाट ७५ अर्ब रुपैयाँ बढी नगद मौज्दात घटेको छ । नेपाल राष्ट्र बैंकले सार्वजनिक गरेको तथ्यांक अनुसार चालु आर्थिक वर्षको साउनको तुलनामा भदौंमा उक्त रकम ७५ अर्ब ५ करोड रुपैयाँले घटेको हो ।

गत साउनमा सरकारी खातामा तीन खर्ब १२ करोड रुपैयाँ नगद मौज्दात रहेको थियो । भदौंमा उक्त रकम घटेर २ खर्ब ३६ अर्ब ९५ करोड रुपैयाँ पुगेको छ । यो रकम सरकारले खर्च गरेर बाँकी रहेको रकम हो ।

गत असार मसान्तसम्म तीन खर्ब ५५ अर्ब ४५ रुपैयाँ रहेको यस्तो मौज्दात चालु आवको भदौं मसान्तसम्म आइपुग्दा एक खर्ब १८ अर्ब ५० करोड अर्ब रुपैयाँले घटेको छ ।

यस अवधिमा सरकारी ढुकुटीमा २ खर्ब ३८ अर्ब बढी निक्षेप रहेको जनाएको छ । यस अवधिमा विभिन्न बैंकहरुमा रहेको सरकारी खातामा कूल २ खर्ब ३८ अर्ब ३० करोड ९० लाख रुपैयाँ निक्षेप रहेको बैंकले राष्ट्र बैंकले जनाएको हो ।

२०८१ असारसम्म यस्तो निक्षेप जम्मा ६३ अर्ब ९५ करोड ३३ लाख रुपैयाँ मात्र रहेको थियो । उक्त रकम भदौं मसान्तसम्म आइपुग्दा एक खर्ब ७४ अर्ब ३५ करोड ५६ लाख रुपैयाँले बढेको छ ।

यस अवधिमा सरकारको सरप्लस मौज्दात शुन्य रहेको छ । राष्ट्र बैंकका अनुसार भदौं मसान्तसम्म वित्तीय बजारमा क्यास सर्कुलेशन २.१६ प्रतिशतले घटेको छ । राष्ट्र बैंकका अनुसार भदौं मसान्तसम्म वित्तीय बजारमा १४ अर्ब ७१ करोड ७८ लाख रुपैयाँ भन्दा बढी नगद प्रवाह घटेको छ ।

यस अवधिमा नगद प्रवाह ६ खर्ब ६५ अर्ब ३३ करोड ९ लाख ९५ हजार रुपैयाँ रहेको हो । गत असार मसान्तसम्म यस्तो प्रवाह ६ खर्ब ८० अर्ब ४ करोड ८८ लाख २ हजार रुपैयाँ रहेको थियो ।

भदौं मसान्तसम्म राष्ट्र बैंकको रिजर्भमा ६ खर्ब एक अर्ब ७८ करोड ९९ लाख रुपैयाँ रहेको छ । २०८१ असारसम्म रिजर्भमा ५ खर्ब ७२ अर्ब ७ करोड ९५ लाख रुपैयाँ थियो । आईएमएफसँग सम्बन्धित दायित्व ३९ अर्ब ४८ करोड १७ लाख रुपैयाँ रहेको छ ।

त्यसैगरी राष्ट्रिय ढुकुटीमा नेपालको सम्पत्ति ८७ अर्ब ४६ करोड ६२ लाख रुपैयाँले बढेको छ । राष्ट्र बैंकका अनुसार गत असार मसान्तसम २० खर्ब ५६ अर्ब ५३ करोड ९९ लाख रुपैयाँ रहेको थियो । उक्त सम्पति चालु आवमा आइपुग्दा ४.२५ प्रतिशतले बढेर २१ खर्ब ४४ अर्ब ६१ लाख रुपैयाँ पुगेको छ ।

कर्पाेरेट बजार

प्रकाशित समय : १४:२० बजे