काठमाडौं । बागमती प्रदेश सरकारको राजस्व संकलनमा वृद्धि भएको छ । प्रदेश सरकारको राजश्व संकलन एकै वर्ष झन्डै ५ प्रतिशत वृद्धि भएको हो ।

आर्थिक मामिला तथा योजना मन्त्रालयका तथ्याङ्क अनुसार आर्थिक वर्ष २०८०-८१ मा २५ अर्ब ५० करोड ४२ लाख संकलन भएको हो ।

अघिल्लो आव २०७९-८० मा २४ अर्ब ३५ करोड ४२ लाख राजस्व संकलन गरेको थियो । तर, ग आव २०८०-८१ मा एक अर्ब १५ करोडभन्दा बढी राजस्व संकलन गर्न सफल भएको हो ।

बागमती प्रदेश सरकार अन्तरगत कोष तथा लेखा नियन्त्रक कार्यालय प्रमुख हरि प्रसाद उपाध्यायले लक्ष्य अनुसार नै राजस्व संकलन भएको बताए । तर, घरजग्गा रजिष्ट्रेशन ‘मालपोत’ र सवारीसाधन करमा केहि कमी आएको छ ।

आर्थिक तरलताका कारण घरजग्गा तथा नयाँ सवारीसाधन खरिद बिक्री कारोबारमा सोचे जस्तो राजस्व सङ्कलन नभएको उनले बताए । यद्यपि तुलनात्मक रुपमा गत आर्थिक वर्ष भन्दा ४ दशमलव ७२ प्रतिशत भएको बताए । यसलाई सन्तोषजनक मान्नुपर्ने उनको भनाई छ।

विशेषत प्रेदशमा घरजग्गा रजिष्ट्रेशन ‘मालपोत’ र सवारीसाधन कर प्रदेश सरकारको राजस्व सङ्कलनको मुख्य आयस्रोत मानिन्छ । प्रदेश सरकारको आर्थिक मामिला तथा योजना मन्त्रीको रुपमा कुन्दनराज काफ्लेले जिम्मेवारी सम्हालेपछि प्रदेशको अर्थतन्त्र थप सकारात्मक रुपमा चलायमान भएको उपाध्यायको भनाई छ ।

मन्त्रालयको तथ्याङ्क अनुसार दुवै शीर्षकबाट गत आवमा १४ अर्ब राजस्व सङ्कलन हुने अनुमान गरिएको थियो । तर, ११ अर्ब ६० करोड ७६ लाख ५० हजार मात्र राजस्व सङ्कलन भएको छ ।

यस्तै, घरजग्गा रजिष्ट्रेशन शीर्षकबाट ६ अर्ब ७५ करोड राजस्व सङ्कलन गर्ने लक्ष्य रहेकामा करिब ८१ दशमलव ३२ प्रतिशत अर्थात् ५ अर्ब ४८ करोड ९३ लाख ३८ हजार रुपैयाँ राजस्व सङ्कलन भएको छ ।