काठमाडौँ । बैंकिङ उद्योगका ठुला दुई हिमालयन बैंक र नेपाल इन्भेष्टमेन्ट बैंकबीच मर्जरको अन्त्यमा आएका छन् । आज एक कार्यक्रममा बीच प्रारम्भिक समझदारी(एमाओयू)मा हस्ताक्षर हुन लागेको हो ।

काठमाण्डौको एलोफ्ट होटलमा एक औपचारिक कार्यक्रममा दुवै बैंकका अध्यक्षहरु पृथ्वीबहादुर पाँडे र तुलसी गौतमले आज एमाओयूमा हस्ताक्षर गर्नेछन् । कार्यक्रममा अत्यन्त न्यून मात्र उपस्थिति हुनेछ भने हस्ताक्षर कार्यक्रमको लाइभ भर्चुअल माध्यमबाट गरिने इन्भेष्टमेण्टका प्रमुख कार्यकारी अधिकृत ज्योतिप्रकाश पाण्डे बताए ।

यी दुई बैंकबीच एक बराबर एकको सेयर स्वाप अनुपातमा मर्जर सम्झौता हुन लागेको हो । मर्जरपछि बन्ने बैंकको नाम ‘हिमालयन इन्भेष्टमेन्ट बैंक’ रहने दुवै बैंकको संचालक समितिले निर्णय गरिसकेको छ ।

मर्जरपछि बन्ने बैंकको प्रमुख कार्यकारी अधिकृतको रुपमा अशोक राणा नै रहनेछन् भने संचालक समितिको अध्यक्षमा इन्भेष्टमेन्ट बैंकका अहिलेको अध्यक्ष पृथ्वीबहादुर पाँडे रहनेछन् । इन्भेष्टमेण्टका सीईओ ज्योति पाण्डे भने मर्जरपछि डेपुटी सीईओको भूमिकामा रहने छन् ।

त्यस्तै दुबै बैंकबाट ३–३ जना सञ्चालक राख्ने र थप १ जना स्वतन्त्र सञ्चालक मनोनित गर्ने सहमति भएको छ ।

दुई बैंकबीच मर्जरको सम्झौतापछि चालु आर्थिक वर्षभित्रैबाट एकीकृत कारोबार भने सुरु हुन नसक्ने देखिएको छ । अब नयाँ आर्थिक वर्षको पहिलो त्रैमासभित्र मर्जरको सबै काम सकेर एकीकृत कारोबार थाल्ने गरी एमओयू हुन लागेको हो ।