काठमाडौं फनपार्कसहित ५ संस्थाले बुझाए महानगरलाई ७१ लाख बढी कर
वि.सं.२०७९ भदौ २७ सोमवार
काठमाडौं । काठमाडौं महानगरपालिकाकाको ताकेता गरे पछि पाँच संस्थाले ७१ लाख २५ हजार ३८८ रुपैयाँ कर भुक्तानी गरेका छन् ।
काठमाडौं फनपार्क, डेल्टिन क्यासिनो होटल (म्यारियट), बेलिज क्यासिनो (मल्ल होटल), माजोङ्ग इन्टरटेनमेन्ट (होटल सोल्टी) र सिविक हस्पिटलले महानगरलाई कर तिरेका हुन् ।
महानगरपालिकाले भदौ १५ देखि भदौ २३ सम्म विभिन्न संस्थालाई कर तिर्न भन्दै पत्राचार गरेको थियो । गत भदौ १५ गते प्रदर्शनी मार्गस्थित फनपार्कलाई महानगरले २४ घण्टाभित्रमा मनोरञ्जन कर तिर्न अल्टिमेटम दिएको थियो ।
२४ घण्टाभित्रमा कर नबुझाएमा फनपार्क सिल गर्ने र आवश्यक कारबाही गर्ने भन्दै महानगरले पत्रचार गरेको थियो । उक्त संस्थाले भोलिपल्टै भदौ १६ गते १७ लाख ३६ हजार ११ रुपैयाँ मनोरञ्जन कर तिरेको छ ।
त्यस्तै, महानगरले भदौ १९ गते काठमाडौंका विभिन्न क्षेत्रमा रहेका होटलका क्यासिनो तथा मनोरञ्जनात्मक क्षेत्रहरुलाई पनि मनोरञ्जन कर तिर्न पत्रचार गरेको थियो । सात दिनभित्रमा कर तिर्न भन्दै म्यारियट होटलस्थित डेल्टिन क्यासिनो, अन्नपूर्ण होटलस्थित क्यासिनो प्यालेस, ¥याडिसन होटलस्थित क्यासिनो ¥याट, हायात होटलस्थित प्राइड इन्टरटेनमेन्ट एण्ड रिक्रीएसन, सोल्टी होटलस्थित बाल्को क्यासिनो र मल्ल होटलस्थित बेली क्यासिनोलाई सात दिनभित्रमा कर तिर्न पत्रचार गरेको थियो ।
क्यासिनो तथा मनोरञ्जामत्मक क्षेत्रहरुलाई दिएको समयसीमा भदौ २५ मा सकिएको छ । तर, यीमध्ये डेल्टिन क्यासिनो होटल (म्यारियट), बेलिज क्यासिनो (मल्ल होटल) र मोजोङ्ग इन्टरटेनमेन्ट (होटल सोल्टी)ले मात्रै कर तिरेका छन् । यी मध्ये डेल्टिनले भदौ २३ मा २१ लाख ४२ हजार ३४ रुपैयाँ कर तिरेको हो । त्यस्तै, बेलिज क्यासिनोले पनि २३ गते १३ लाख ८८ हजार ३६३ मनोरञ्जन कर तिरेको छ । म्याजोङ्गले पनि २३ गते नै महानगरलाई ९ लाख ९३ हजार ६ सय कर तिरेको छ ।
महानगरपालिकालको २१ गते पनि १० दिनभित्रमा कर तिर्न भन्दै विभिन्न संस्थाहरुलाई पत्रचार गरेको थियो । जसमध्येको सिविक हस्पिटलले पनि २३ गते कर तिरेको छ । उक्त हस्पिटलले ८ लाख ६५ हजार ३८० रुपैयाँ कर तिरेको हो ।
भदौ २३ मा महानगरले १० दिनको समयसीमा तोक्दै शंकरदेव क्याम्पस, आरआर क्याम्पस, नेपाल ल क्याम्पस, वीर अस्पताल, दशरथ रंगशाला, सरस्वती बहुमुखी क्याम्पस, नेपाल कमर्श क्याम्पसलाई पनि बहालमा लगाएका संरचनाबाट आम्दानी भएवातको बहाल कर तिर्न पत्रचार गरेको थियो ।
त्यस्तै नेपाल आर्मी केन्द्रीय कार्यालय, समाज कल्याण परिषद् लैनचौर र नेपाल प्रहरीको नक्साल कार्यालयलाई पनि बहाल कर बुझाउन महानगरले १० दिनको समयसिमासहित पत्राचार गरेको छ ।
प्रकाशित समय : १७:२९ बजे