काठमाडौं । काठमाडौंको भृकुटीमण्डपमा जारी ‘नाइमा नेपाल मोबिलिटी एक्स्पो २०२६’ को दोस्रो दिन पनि बाइक तथा गाडी पारखीको उल्लेख्य उपस्थिति देखिएको छ । नयाँ प्रविधि, आकर्षक डिजाइन र विद्युतीय सवारीसाधनप्रति बढ्दो आकर्षणसँगै एक्स्पोमा राखिएका विभिन्न ब्रान्डका सवारीसाधनबारे अवलोकनकर्ताले चासो देखाएका छन् ।

एक्स्पोमा विद्युतीय कार, एसयूभी तथा अन्य सवारीसाधन प्रदर्शनमा राखिएका छन् । त्यसमध्ये एसपीजी अटोमोबाइल्सले ओमोडा र जेको ब्रान्डअन्तर्गतका विद्युतीय सवारीसाधन प्रदर्शनमा राखेको छ । कम्पनीका असिस्टेन्ट म्यानेजरका अनुसार ओमोडा ई५ नेपाली बजारमा स्थापित भइसकेको विद्युतीय गाडी हो ।

कम्पनीले ओमोडा ई५ लाई दुई भेरियन्टमा उपलब्ध गराएको छ । जसमा ओमोडा ई५ प्रो र ओमोडा ई५ लङ रेन्ज । उनका अनुसार ओमोडा ई५ प्रोमा ५०.७ किलोवाट क्षमताको एलएफपी ब्याट्री र ९९ किलोवाटको मोटर उपलब्ध छ । एकपटक पूर्ण चार्ज गर्दा यसले ३५० किलोमिटरसम्मको रेन्ज दिने कम्पनीको दाबी छ ।

उनले भने, ‘हामीसँग ओमोडा ई५ दुईवटा भेरियन्टमा उपलब्ध छ । ओमोडा ई५ प्रो र ओमोडा ई५ लङ रेन्ज । ओमोडा ई५ प्रोमा ५०.७ किलोवाटको ब्याट्री र ९९ किलोवाटको मोटर पाउनुहुन्छ । एकपटक चार्ज गर्दा यसले ३५० किलोमिटरसम्मको रेन्ज दिन्छ । यो नेपाली बजारमा विगत दुई वर्षदेखि चलिरहेको र ग्राहकले राम्रो रुचाएको गाडी हो । अहिलेसम्म १ हजार ५०० भन्दा बढी गाडी नेपाली सडकमा गुडिरहेका छन् ।’

ओमोडा ई५ प्रोको सुरुवाती मूल्य ५१ लाख ५९ हजार रुपैयाँ तोकिएको छ । मोनो–टोन भेरियन्टको मूल्य ५१ लाख ५९ हजार रुपैयाँ र डुअल–टोनको मूल्य ५१ लाख ९९ हजार रुपैयाँ रहेको कम्पनीले जनाएको छ । नाइमा नेपाल मोबिलिटी एक्स्पोका लागि भने कम्पनीले विशेष छुटसहित ४९ लाख ९९ हजार रुपैयाँमा गाडी उपलब्ध गराइरहेको छ ।

विशेष अफरअन्तर्गत ग्राहकले एक वर्षको रोड ट्याक्स र इन्स्योरेन्स निःशुल्क पाउनेछन् । त्यसैगरी ७ किलोवाट र ३ किलोवाट क्षमताका दुईवटा चार्जर उपलब्ध गराइने कम्पनीले जनाएको छ । दुई जना ग्राहकलाई चीन भ्रमणको अवसर तथा प्रत्येक गाडीको डेलिभरीमा एमआईको स्मार्टफोनसमेत उपलब्ध गराउने कम्पनीको अफर छ ।

कम्पनीका प्रतिनिधिका अनुसार ओमोडा ई५ नेपाली बजारमा विगत दुई वर्षदेखि बिक्री हुँदै आएको छ । हालसम्म १ हजार ५०० भन्दा बढी ओमोडा ई५ नेपाली सडकमा गुडिरहेको कम्पनीको दाबी छ ।

‘यो नेपाली बजारमा राम्रो रुचाइएको गाडी हो । विगत दुई वर्षदेखि नेपाली बजारमा चलिरहेको र परीक्षण भइसकेको गाडी भएकाले ग्राहकको विश्वास पनि राम्रो छ,’ कम्पनीका प्रतिनिधिले भने, ‘अहिले हामीसँग गाडीको स्टक पनि छ र बिक्री पनि राम्रो भइरहेको छ ।’

नाइमा नेपाल मोबिलिटी एक्स्पोको पहिलो दिनदेखि नै ओमोडा ई५ को बुकिङ उत्साहजनक रहेको उनले बताए । दोस्रो दिन पनि बुकिङ तथा अवलोकनकर्ताको चाप राम्रो रहेको उनको भनाइ छ ।

कम्पनीले विद्युतीय सवारीसाधनको प्रयोग विस्तारसँगै चार्जिङ पूर्वाधारमा समेत लगानी बढाउने जनाएको छ । यसै वर्षभित्र १०० भन्दा बढी स्थानमा चार्जिङ स्टेसन विस्तार गर्ने कम्पनीको योजना छ।

चार्जिङ समय भने प्रयोग गरिने चार्जरको क्षमतामा निर्भर हुने कम्पनीले जनाएको छ । ८० किलोवाटको चार्जर प्रयोग गर्दा करिब ३० मिनेटमा पूर्ण चार्ज हुने र ६० किलोवाटको चार्जरबाट एक घण्टाभित्र पूर्ण चार्ज गर्न सकिने कम्पनीको दाबी छ ।

कम्पनीले हाल बिक्री गरिरहेका सवारीसाधनमा हाइब्रिडभन्दा पूर्ण विद्युतीय अर्थात् प्योर ईभीलाई प्राथमिकता दिएको छ । ओमोडा ई५ प्रोबाहेक ओमोडा ई५ लङ रेन्ज पनि उपलब्ध छ । लङ रेन्ज भेरियन्टमा ५८.९ किलोवाट क्षमताको एलएफपी ब्याट्री रहेको र एकपटक चार्ज गर्दा ४३० किलोमिटरसम्मको रेन्ज दिने कम्पनीको दाबी छ ।

ओमोडासँगै कम्पनीले जेको ब्रान्डअन्तर्गत जेको जे५ र जेको जे६ पनि प्रदर्शनमा राखेको छ । जेको जे५ प्रोले ३५० किलोमिटर रेन्ज दिने तथा जेको जे५ लङ रेन्जले ४६१ किलोमिटरसम्म रेन्ज दिने कम्पनीको दाबी छ ।

कम्पनीका अनुसार सवारीसाधनले दिने वास्तविक रेन्ज भने सडकको अवस्था, ड्राइभिङ शैली, ट्राफिक र मौसमलगायतका विषयमा निर्भर गर्छ । विशेषगरी हाइवे तथा समथर सडकमा कम्पनीले दाबी गरेको रेन्जभन्दा बढी रेन्जसमेत प्राप्त हुन सक्ने प्रतिनिधिको भनाइ छ ।

कम्पनीले काठमाडौं उपत्यकाभित्र कुपण्डोल र सीतापाइलामा सर्भिस सेन्टर सञ्चालन गरिरहेको छ । उपत्यकाबाहिर मुख्य सहरहरूमा गरी १८ वटा स्थानमा सर्भिस सेन्टर उपलब्ध रहेको कम्पनीले जनाएको छ । ओमोडा ई५, जेको जे५ र जेको जे६ लगायतका सवारीसाधनका लागि यी सर्भिस सेन्टरबाट सेवा उपलब्ध हुने कम्पनीको भनाइ छ ।

कम्पनीका अनुसार ओमोडा ई५ प्रोको मूल्य ५१ लाख ५९ हजार रुपैयाँदेखि सुरु हुन्छ । जेको जे६ को मूल्य ६९ लाख ९९ हजार रुपैयाँ रहेको छ। कम्पनीले हाल उपलब्ध ओमोडा र जेकोका सवारीसाधन ५० लाख रुपैयाँभन्दा माथिको मूल्य दायरामा रहेको जनाएको छ ।

जेको जे६ : अफरोडदेखि लक्जरीसम्म

नाइमा नेपाल मोबिलिटी एक्स्पोमा जेको जे६ ले पनि अवलोकनकर्ताको ध्यान तानेको कम्पनीका प्रतिनिधि सिद्धार्थ बज्राचार्यले बताए ।

उनका अनुसार जेको जे६ मा २२५ मिलिमिटरको ग्राउन्ड क्लियरेन्स रहेको छ । यसमा ६५.६९ किलोवाट क्षमताको ब्याट्री रहेको र डब्लुएलटीपी मापदण्डअनुसार ४३१ किलोमिटर रेन्ज दिने कम्पनीको दाबी छ ।

बज्राचार्यका अनुसार जेको जे६ विशेषगरी अफरोड क्षमता र लक्जरीलाई ध्यानमा राखेर तयार गरिएको विद्युतीय एसयूभी हो ।

‘यो गाडी अफरोड र लक्जरी दुवैका लागि बनाइएको हो । यसको ग्राउन्ड क्लियरेन्स २२५ एमएम छ र ६५.६९ किलोवाटको ब्याट्री रहेको छ । डब्लुएलटीपी रेन्ज ४३१ किलोमिटर छ,’ उनले भने ।

उनले ७० लाख रुपैयाँ आसपासको मूल्य दायरामा जेको जे६ उत्कृष्ट विकल्पमध्ये एक भएको दाबी गरे । ग्राहकको रोजाइमा समेत यो गाडी परेको उनको भनाइ छ।

‘यो हाम्रो हाइएस्ट सेलिङ भेहिकल पनि हो। धेरैले रुचाएको गाडी हो । ७० लाख रुपैयाँको रेन्जमा यो गाडी उत्कृष्ट गाडीमध्ये एक हो,’ बज्राचार्यले भने ।

‘नाइमा नेपाल मोबिलिटी एक्स्पो २०२६’ को दोस्रो दिनसम्म आइपुग्दा नयाँ पुस्ताका विद्युतीय सवारीसाधनप्रति उपभोक्ताको चासो उल्लेख्य देखिएको छ । एकातर्फ नयाँ प्रविधि र रेन्जमा सुधार भएका विद्युतीय सवारीसाधन प्रदर्शनीमा छन् भने अर्कोतर्फ कम्पनीहरूले चार्जिङ तथा सर्भिस नेटवर्क विस्तारलाई प्राथमिकता दिन थालेका छन् ।