काठमाडौँ । नेपाली बजारमा टाटा मोटर्सको नयाँ पन्च ईभी फेसलिफ्ट मोडलको औपचारिक बिक्री सुरु भएको छ। नेपालका लागि टाटा मोटर्सको आधिकारिक बिक्रेता सिप्रदी ट्रेडिङले काठमाडौँमा मंगलबारदेखि सुरु भएको ‘नाइमा मोबिलिटी एक्स्पो २०२६’ को अवसर पारेर नयाँ पन्च ईभी फेसलिफ्ट बिक्री सुरु गरेको हो।

कम्पनीले पन्च ईभी फेसलिफ्टलाई कुल तीन वटा भेरियन्टमा उपलब्ध गराएको छ। नयाँ बजेट संशोधन तथा इन्ट्रडक्टरी अफरपश्चात् पन्च ईभीको मूल्य अघिल्लो मोडलको तुलनामा ४ लाख रुपैयाँसम्मले घटेको छ। सिप्रदीका अनुसार पन्च ईभी फेसलिफ्टको बेस भेरियन्टको मूल्य ३३ लाख ९९ हजार रुपैयाँ र टप भेरियन्टको मूल्य ३७ लाख ९९ हजार रुपैयाँ तोकिएको छ। यसअघि पुरानो पन्च ईभी ३७ लाख ९९ हजारदेखि ३९ लाख ९९ हजार रुपैयाँसम्ममा बिक्री हुँदै आएको थियो।

नयाँ पन्च ईभीमा ३० किलोवाट आवर (kWh) र ४० किलोवाट आवर (kWh) गरी दुई वटा ब्याट्री विकल्पहरू प्रदान गरिएको छ। यी दुवै ब्याट्री क्षमता अघिल्लो पन्च ईभीको तुलनामा ५ किलोवाट आवरले बढी हुन्। चार्जिङ क्षमताका हिसाबले यो ६५ किलोवाटको डीसी फास्ट चार्जर सपोर्ट गर्ने गरी तयार पारिएको छ, जसबाट ब्याट्रीलाई २० देखि ८० प्रतिशतसम्म चार्ज गर्न मात्र २६ मिनेट लाग्नेछ। साथै, १५ मिनेट मात्र चार्ज गर्दा पनि १३५ किलोमिटरसम्मको रेन्ज प्राप्त हुने कम्पनीको दाबी छ।

डिजाइनतर्फ नयाँ पन्च ईभीमा टाटाका ठूला ईभी मोडलहरूबाट प्रेरित १६ इन्चका एरो-अप्टिमाइज्ड एलोय ह्वील राखिएका छन्। पछाडिको भागमा भने आइस (इन्धन) पन्च फेसलिफ्टकै शैलीका नयाँ कनेक्टेड एलईडी टेललाइटहरू जडान गरिएको छ।

इन्टेरियरमा साविककै ड्यासबोर्ड डिजाइन कायम राखिए पनि नयाँ ट्रिम फिनिस र अपडेटेड दोहोरो रङ (डुअल-टोन) को थिम थपिएको छ। गाडीको क्याबिनमा १०.२५ इन्चको इन्फोटेनमेन्ट टचस्क्रीन र १०.२५ इन्चकै डिजिटल ड्राइभर डिस्प्ले उपलब्ध छ।

यसबाहेक, गाडीमा आधुनिक सुविधाहरू जस्तै वायरलेस चार्जिङ, भेन्टिलेटेड सिट, एम्बियन्ट लाइट, कनेक्टेड कार टेक्नोलोजी र ३६० डिग्री क्यामेरा समावेश गरिएका छन्। सुरक्षाको दृष्टिकोणले ६ वटा एयरब्याग, इलेक्ट्रोनिक स्टेबिलिटी कन्ट्रोल (ईएससी), हिल होल्ड असिस्ट, टायर प्रेसर मनिटरिङ सिस्टम (टीपीएमएस), आईएसओफिक्स चाइल्ड सिट माउन्ट र हाइ बिम एसिस्ट जस्ता उच्च प्रविधिका फिचरहरू दिइएका छन्।