काठमाडौं । यामाहा नेपालले ‘ब्लू सर्ज–पावरिंग अहेड टुगेदर पार्टनर्स मीट २०२६’ सफलतापूर्वक सम्पन्न गरेको छ। पाँचदिने कार्यक्रममा सहभागी हुन थाइल्याण्ड पुगेका यामाहा नेपालका डिलर तथा साझेदारहरू नयाँ ऊर्जा र आगामी वर्ष थप सफल बनाउने प्रतिबद्धतासहित स्वदेश फर्किएका छन्।

जुलाई २७ देखि ३१ सम्म पटाया र बैंककमा आयोजित कार्यक्रममा औपचारिक साझेदार सम्मेलन, नेटवर्किङ सेसन, सम्मान समारोह तथा विभिन्न मनोरञ्जनात्मक गतिविधि सञ्चालन गरिएको थियो। कार्यक्रममा यामाहाका डिलर नेटवर्कबीच सहकार्य अझ सुदृढ बनाउने र उत्कृष्ट प्रदर्शनको सम्मान गर्ने उद्देश्य राखिएको कम्पनीले जनाएको छ।

कार्यक्रमको गाला डिनरमा गत वर्ष उत्कृष्ट प्रदर्शन गर्ने डिलरहरूलाई विभिन्न विधामा सम्मान गरिएको थियो। बी एण्ड बी अटो ट्रेडर्स, विराटचोकले बेस्ट सोसल मिडिया प्रेजेन्स, एमएडब्लू प्रालि, नेपालगञ्जले बेस्ट रिटेल फाइनान्स पेनिट्रेसन, लुम्बिनी अटो वर्क्स, ग्वार्कोले बेस्ट स्पेयर्स, राज मोटर्स, हेटौंडाले बेस्ट सर्भिस तथा V.A.W इन्टरप्राइजेज, पोखराले हाइएस्ट एएमसी सेल्स अवार्ड प्राप्त गरेका छन्।

यस्तै बेस्ट डिलरतर्फ दिपेश इन्जिनियरिङ अटो पार्ट्स एण्ड सप्लायर्स (A0), बी एण्ड बी अटो ट्रेडर्स (A1), राज मोटर्स (A2) र नवीन अटो सेन्टर, नारायणघाट (A3) सम्मानित भएका छन्।

कार्यक्रमलाई सम्बोधन गर्दै यामाहा मोटर इण्डिया ग्रुपका अध्यक्ष हाजिमे अओटाले नेपाल यामाहाका लागि सबैभन्दा महत्वपूर्ण बजारमध्ये एक भएको बताए। उनले नेपालमा विद्युतीय सवारीसाधनको तीव्र विस्तारलाई उल्लेख गर्दै भारतबाहिर पहिलोपटक यामाहाको e-Zero Series इलेक्ट्रिक मोटरसाइकल नेपालमै सार्वजनिक गर्ने तयारी भइरहेको जानकारी दिए।

उनका अनुसार नेपालको इलेक्ट्रिफिकेसन यात्रा अन्य बजारभन्दा फरक र सम्भावनायुक्त भएकाले कम्पनीले आगामी दिनमा नेपाली बजारमा विद्युतीय सवारी विस्तारलाई प्राथमिकता दिनेछ।

एमएडब्लू राइड्स प्रालिका अध्यक्ष विष्णु कुमार अग्रवालले कम्पनीले तय गरेको लक्ष्यभन्दा बढी उपलब्धि हासिल गरेकाले त्यसको सफलताको उत्सवस्वरूप थाइल्याण्ड भ्रमण आयोजना गरिएको बताए। उनले डिलर नेटवर्कको योगदानको प्रशंसा गर्दै आगामी वर्ष पनि यही उत्साह र प्रतिबद्धताका साथ अघि बढ्ने विश्वास व्यक्त गरे।

मुख्य कार्यक्रमसँगै सहभागीहरूले कोरल आइल्याण्ड भ्रमण, बैंककका प्रमुख पर्यटकीय स्थलको अवलोकन, किनमेल तथा साँझको क्रुज यात्राको समेत अनुभव लिएका थिए।

कम्पनीका अनुसार ‘ब्लू सर्ज–पावरिंग अहेड टुगेदर पार्टनर्स मीट २०२६’ ले यामाहा नेपाल र यसको डिलर नेटवर्कबीचको सहकार्यलाई थप मजबुत बनाउनुका साथै आगामी व्यावसायिक योजनाका लागि नयाँ ऊर्जा प्रदान गरेको छ।