काठमाडौँ । युनियन लाइफ इन्स्योरेन्सको आइपीओ बाँडफाँड आजै हुने भएको छ । बिक्री प्रबन्धक प्रभु क्यापिटलले ‘प्रि अलोटमेण्ट’ कार्य सकेकाले उक्त आईपीओ आजै बाँडफाँड हुने जनाएको हो ।

उक्त आईपीओमा रितपूर्वक आवेदन दिएका कुल आवेदक मध्ये १५ लाख ५४ हजार २९९ को हात खाली हुने भएको हो ।

कम्पनीको आईपीओमा कुल २१ लाख ८२ हजार ७७५ जनाले आवेदन दिएका थिए । यसमध्ये कुल योग्य आवेदनको संख्या भने २१ लाख १२ हजार ७९९ जना रहेको क्यापिटलले अर्थतन्त्रलाई जानकारी दिएको छ ।

क्यापिटलका अनुसार ४ हजार ८०१ आवेदन डुब्लिकेशन भएको जनाएको छ । योग्य कुल आवेदक मध्ये ५ लाख ५८ हजार ५ सय जनालाई न्युनतम १० कित्ता आईपीओ पर्ने छ । क्यापिटलका अनुसार यो नै आधिकारिक तथ्याङ्क हो । यहि तथ्याङ्क अनुसार आजै आईपीओ बाँडफाँड हुने क्यापिटलले जनाएको छ ।

कम्पनीले असार २४ गतेदेखि प्रतिकित्ता १०० रुपैयाँका दरले ६४ लाख ५० हजार कित्ता आईपीओ निष्काशन गरेको थियो ।

जसमा ३ लाख २२ हजार ५०० कित्ता कम्पनीका कर्मचारी र ३ लाख २२ हजार ५०० कित्ता म्युचुअल फन्डको लागि छुट्याइएको थियो । बाँकी ५८ लाख ५ हजार कित्तामा सर्वसाधारणले आवेदन दिन सक्ने व्यबस्था गरेको थियो ।

२०७८ असार ३१ गते प्रकाशित