काठमाडौं । शिव शंकर हाइड्रो इन्भेष्टमेन्ट लिमिटेड कम्पनीले सर्वसाधारणका लागि शेयर जारी गर्ने भएको छ ।

कम्पनीले सर्वसाधारणका लागि शेयर जारी गर्ने लक्ष्मी सनराइज क्यापिटलका तर्फबाट प्रमुख कार्यकारी अधिकृत बिजय लाल श्रेष्ठ र शिव शंकर हाइड्रो इन्भेष्टमेन्टका तर्फबाट अध्यक्ष खगेश्वर बोहराले हस्ताक्षर गरेका छन् ।

कम्पनीले सर्वसाधारणका लागि १ सय रुपैयाँ अंकित दरका २५ करोड रुपैयाँ बराबरको २५ लाख कित्ता साधारण शेयर निष्कासन गर्नेछ । शिव शंकर हाइड्रो इन्भेष्टमेन्ट, शिव शंकर इन्भेष्टमेन्ट र जय गणेश इन्भेष्टमेन्ट कम्पनी एक आपसमा गाभिएर स्थापित भएको एक लगानी इन्भेष्टमेन्ट कम्पनी हो ।

हाल कम्पनीले सानिगार्ड हाइड्रो लिमिटेड ३८.४६ मेगावाट, कलंगा हाइड्रो लिमिटेड १५.३३ मेगावाट, बुंगल हाइड्रो लिमिटेड १०.७ मेगावाट र भिजन ईनर्जी एण्ड पावर लिमिटेड ५७.५ मेगावाट नामक जलबिद्युत कम्पनीहरुमा लगानी गरेको छ । नेपाल धितोपत्र बोर्डमा पहिलो ३ कम्पनीहरु संचालनमा आइसकेको र प्राथमिक शेयर निष्कासनको प्रकृयाका लागि दर्ता भईसकेको कम्पनीले जनाएको छ ।

साधारण शेयर निष्कासन पश्चात उक्त कम्पनीको चुक्ता पुँजी १ अर्ब ५ करोड रुपैयाँ पुग्नेछ । कम्पनीले शेयर निष्कासन तथा बिक्री प्रबन्धकमा लक्ष्मी सनराइज क्यापिटल लिमिटेडलाई नियुक्त गरेको छ ।