काठमाडौं । नेपाली बजारमा कारोबार हुने साताको तेस्रो दिन मंगलबार नेप्से परिसूचक बढेर बन्द भएको छ।

आज नेप्से परिसूचक १७.८० अंक बढेर २७७५.८५ विन्दुमा रोकिएको छ। नेप्से बढेपनि आज कारोबार रकम भने घटेको छ।

अघिल्लो कारोबार दिन साढे १० अर्बको शेयर खरिदबिक्री भएको बजारमा आज ८ अर्ब ५२ लाख १२ हजार रुपैयाँ बराबरको १ करोड ८१ लाख ६० हजार कित्ता शेयर खरिदबिक्री भएको छ।

आज ५ स्टकको शेयर सकारात्मक सर्किट लेभलमा कारोबार भएको छ। दिव्यश्वरी हाइड्रोपावर, इंगवा हाइड्रोपावर, खानीखोला हाइड्रोपावर, जोशी हाइड्रोपावर र सुपर मादी हाइड्रोपावरको शेयर सकारात्मक सर्किट लेभलमा कारोबार भएको हो।

कारोबार रकमका आधारमा यस दिन ङादी ग्रुप पावर शीर्ष स्थानमा रहेको छ। सो कम्पनीको २६ करोड ७५ लाख रुपैयाँ बराबरको शेयर कारोबार भएको छ। जानकी फाइनान्सको साढे २६ करोडभन्दा बढीको शेयर खरिदबिक्री भएको छ भने बेस्ट फाइनान्सको २४ करोडभन्दा बढीको शयर किनबेच भएको छ।

१३ उपसमूहमध्ये यस दिन ७ उपसमूहको परिसूचक बढेको छ भने ६ उपसमूहको परिसूचक घटेको छ। आज व्यापार उपसमूहको परिसूचक सर्वाधिक ५.९६ प्रतिशत, वित्त, जलविद्युत र जीवन बीमा उपसमूहको परिसूचक १ प्रतिशतभन्दा बढी बढेको छ।

कारोबारमा आएको होटल तथा पर्यटन उपसमूहको परिसूचक यस दिन सर्वाधिक १.७१ प्रतिशतले घटेको छ।