काठमाडौं । नेपाल एयरलाइन्सको वाइडबडी जहाज ए ३३० नाइन एन–ए.एल.वाई बिहीबार बिहान काठमाडौंस्थित त्रिभुवन अन्तर्राष्ट्रिय विमानस्थलमा अवतरण भएको छ ।

नेपाल वायुसेवा निगमका प्रवक्ता रमेश पौडेलका अनुसार एउटा वाइडबडी जहाज बिहान ८ः३६ मा एअरपोर्टमा अवतरण गरिएको हो । गत २२ जुनमा सीचेक (हवाईजहाजको प्राविधिक जाँच) का लागि इटालीमा पठाइएको थियो ।

निगमसँग अब दुई न्यारोबडी र एक वाइडबडी गरी तीनवटा जहाज उडानयोग्य व्यवस्थामा आएका छन् । राष्ट्रिय ध्वजाबाहक निगमसँग अन्तर्राष्ट्रिय उडानमा चार वटा जहाज छन् ।

यो जहाज उडानमा आएसँगै जापान उडानलाई पुनः निरन्तरता दिने निगमका अधिकारीहरुले बताए । अगस्ट २९ बाट जहाज अभावमा जापान उडानलाई स्थगित गरिएको थियो ।

तर निगमको अर्को वाइडबडी जहाज के.एलवाई सीचेकका लागि इटालीमै अझै छ । सो जहाज एक महिनापछि आउने तालिका रहेको निगम स्रोतले जनाएको छ ।