काठमाडौं । फागुनमा करिव साढे ३ अबै रुपैयाँ विदेशी लगानी प्रतिवद्धता भएको छ । उद्योग विभागले सार्वजनिक गरेको चालु आर्थिक वर्ष २०७९/८० को फागुन मसान्तसम्मको तथ्याङ्कले यस्तो देखाएको हो ।
सो महिनामा ३ अर्ब ४४ करोड ९८ लाख ३८ हजार विदेशी लगानी प्रतिवद्धता भएको विभागले जनाएको छ । फागुन महिनामा १५ वटा नयाँ उद्योगमा १९ अर्ब २९ करोड रुपैयाँ लगानी प्रतिबद्धता जनाइएको छ ।
यस्तै, १० वटा उद्योगमा लगानीकर्ताले एसपीए/एसएसए र टीटीए गरी १ अर्ब ५२ करोड ८ लाख रुपैयाँ लगानी प्रतिवद्धता भएको विभागले जनाएको छ । फागुनमा दर्ता भएका उद्योगबाट ८७३ जनाले रोजगारी पाउने उल्लेख गरिएको छ । फागुन महिनामा भने सबैभन्दा बढी पर्यटन क्षेत्रमा लगानी भित्रिएको छ ।
दर्ता भएको उद्योगमध्ये ७ वटा अर्थात् ४६ प्रतिशत विदेशी लगानीकर्ताले पर्यटन क्षेत्रमा प्रतिवद्धता जनाएका छन् । विभागअनुसार पर्यटन क्षेत्रपछि सेवा क्षेत्रमा ४ वटा अर्थत् २७ प्रतिशत, उत्पादन क्षेत्रमा ३ वटा अर्थात् २० प्रतिशत र इन्फाइस्ट्रक्चर क्षेत्रमा एउटा अर्थात् ७ प्रतिशत लगानी भित्रिएको छ ।
विभागका अनुसार चालु आर्थिक वर्षको ८ महिनाको अवधिमा विभिन्न देशबाट ३१ अर्ब २१ करोड ११ लाख रुपैयाँ विदेशी लगानी प्रतिवद्धता जनाइएको छ । विभागका अनुसार साउनदेखि फागुन मसान्तसम्ममा सेयर पर्चेज एग्रिमेन्ट(एसपीए), सेयर सब्सक्रिप्सन एग्रिमेन्ट(एसएसए) र टेक्नोलोजी ट्रान्सफर एग्रिमेन्ट(टीटीए) क्षेत्रसहित नयाँ उद्योगमा गरी लगानी प्रतिवद्धता जनाएका छन् ।
लगानीकर्ताले फागुनसम्ममा १५९ वटा नयाँ उद्योग दर्ता गरी २० अर्ब ५६ करोड रुपैयाँ लगानी प्रतिवद्धता जनाएका हुन् । त्यसबाहेक एसपीएर र एसएसए गरी ४३ वटा उद्योगमा १० अर्ब ६५ करोड ११ लाख रुपैयाँ लगानी प्रतिवद्धता विभागले जनाएको छ । साथै, टीटीए क्षेत्रमा ३७ वटा उद्योग दर्ता भएका छन् । दर्ता भएका उद्योगबाट ९ हजार ४७८ जनाले रोजगारी पाउने विभागले जनाएको छ ।
फागुनसम्ममा प्रतिवद्धता भएको लगानीमध्ये सबैभन्दा बढी सेवा क्षेत्रमा छ । सेवा क्षेत्रमा मात्रै ७० वटा उद्योग अर्थात् ४४ प्रतिशत हिस्सा लगानी भएको छ ।
दोस्रो स्थानमा रहेको पर्यटन क्षेत्रमा ६१ वटा उद्योग अर्थात् ३८ प्रतिशत, उत्पादन क्षेत्रमा १६ वटा अर्थात् १० प्रतिशत, आइसीटी क्षेत्रमा ७ वटा अर्थात् ५ वटा र इन्फाइस्ट्रक्चर क्षेत्रमा ५ वटा अर्थात् ३ प्रतिशत विदेशी लगानी प्रतिवद्धता जनाइएको छ ।
नेपालमा हालसम्म विश्वका विभिन्न देशबाट ४ खर्ब ३९ अर्ब ८२ करोड ९५ लाख रुपैयाँ लगानी प्रतिवद्धता विभागले जनाएको छ ।
