काठमाडौँ । साहस उर्जा लिमिटेडको आईपीओमा आवेदन दिनेको संख्याले नयाँ कृतिमान कायम गरेको छ । आवेदन दिने अन्तिम दिन (असोज १० गते) मात्रै २४ लाख बढीले आवेदन दिएका छन् ।

यो सँगै आइतबार साँझ ५ बजे सम्मको तथ्याङ्क अनुसार २४ लाख ६२ हजार आवेदकले ३ करोड ४३ लाख कित्ता शेयरका लागि आवेदन दिएका छन् । यो माग गरिएको भन्दा ५.६२ गुणा बढी आवेदन परेको हो । आईपीओ निष्काशन तथा बिक्री प्रबन्धक एनआईबिएल एस क्यापिटलका अनुसार यो आवेदन हालसम्म कै उच्च हो ।

यसअघि सानीमा लाइफ इन्स्योरेन्सको आईपीओमा २४ लाख १९ हजारले आवेदन दिएका थिए । उक्त रेकर्ड तोड्दै साहस उर्जाको आईपीओमा परेको आवेदनले नयाँ रेकर्ड बनाएको हो ।

साहस उर्जा लिमिटेडले बुधबार (असोज ६ गते) देखि सर्वसाधारणका लागि प्राथमिक शेयर (आईपीओ) निष्काशन तथा बिक्री खुला गरेको हो । कम्पनीको आईपीओमा आवेदन दिने समय सकिएको छ ।

कम्पनीले १०० रुपैयाँ अंकित दरका ७० करोड रुपैयाँ बराबरको ७० लाख कित्ता शेयर बिक्री खुला गरेको हो । जसमध्ये ३ प्रतिशत अर्थात २ लाख १० हजार कित्ता शेयर कर्मचारीहरुका लागि, ५ प्रतिशत अर्थात ३ लाख ५० हजार कित्ता शेयर सामूहिक लगानी कोष र बाँकी रहने ६४ लाख ४० हजार कित्ता शेयरको लागि मात्रै सर्वसाधारणका लागि छुट्याईएको छ ।

कम्पनीको आईपीओ निष्काशन तथा बिक्री प्रबन्धकमा एनआईबिएल एस क्यापिटल लिमिटेड रहेको छ भने प्रत्याभुतकर्ता नागरिक लगानी कोष रहेको छ ।

कम्पनीले निष्काशन गरेको आईपीओलाई इक्रा नेपालले इक्राएनपि आईआर डबल बी प्लस रेटिङ्ग प्रदान गरेको छ। यसले समयमा वित्तीय दायित्व पुरा गर्न सक्ने सम्बन्धमा मध्यम जोखिम रहेको जनाउँदछ ।
२०७८ असोज ११ गते प्रकाशित