काठमाडौं । नेपाल स्टक एक्सचेन्ज (नेप्से) ले ‘धितोपत्र कारोबार सञ्चालन (चौथो संशोधन) विनियमावली, २०८२’ आज (वैशाख ७ गते) देखि कार्यान्वयनमा ल्याएको छ।

नयाँ व्यवस्थाले लगानीकर्तालाई नियमित बजार समयबाहेक पनि सेयर खरिद-बिक्रीको अर्डर राख्न पाउने ‘आफ्टर मार्केट अर्डर’ (AMO) को कानुनी बाटो खोलिदिएको छ। तर, कार्यान्वयनको पहिलो दिन नै लगानीकर्ताहरू यो सुविधा प्रयोग गर्नबाट वञ्चित भएका छन्।

नयाँ नियम लागू भइसक्दा पनि ट्रेडिङ म्यानेजमेन्ट सिस्टम (TMS) मा अर्डर राख्ने विकल्प पहिले जस्तै ‘डिसेबल’ देखिएपछि लगानीकर्ताहरू अन्यौलमा परेका हुन्। यस विषयमा नेप्सेका प्रवक्ता मुराहरि पराजुलीले नेप्सेले नीतिगत अवरोध हटाइसकेको तर यसको वास्तविक कार्यान्वयन ब्रोकरहरूको प्रणालीमा निर्भर रहने बताएका छन्।

पराजुलीका अनुसार, “नेप्सेले यो सुविधालाई वैधानिकता दिएको हो। अब ब्रोकरहरूले आफ्नो सिस्टम र पूर्वाधार तयार पारी यसलाई ‘एक्टिभ’ गराउनुपर्छ। यो सुविधा दिने वा नदिने भन्ने कुरा अब ब्रोकर र उनीहरूको प्राविधिक क्षमतामा भर पर्छ।”

विशेष गरी कार्यालय समयमा व्यस्त रहने साना लगानीकर्ताका लागि यो व्यवस्था निकै उत्साहजनक मानिए पनि ब्रोकर र टिएमएस भेन्डर (वाइको लगायत) बीचको समन्वय अभावले पहिलो दिन यो सुविधा ‘कागजमै सीमित’ बन्न पुगेको छ।