काठमाडौं । हिमालयन एभरेष्ट इन्स्योरेन्सको नाफा ५० प्रतिशत बढेको छ। कम्पनीले बुधवार प्रकाशन गरेको गत आर्थिक वर्ष २०८०-८१ को चौथो त्रैमासिक वित्तीय विवरणले यस्तो देखाएको हो।

गत आवमा कम्पनीले कुल ६६ करोड ७९ लाख ४५ हजार रुपैयाँ खुद नाफा कमाएको छ । जुन अघिल्लो आवको तुलनामा ५०.०८ प्रतिशत बढी हो । अघिल्लो आवमा कम्पनीले ४४ करोड ५० लाख ५९ हजार रुपैयाँ खुद नाफा कमाएको थियो ।

गत आवमा कम्पनीको खुद बीमा शुल्क आर्जन पनि ३६.९४ प्रतिशत बढेर १ अर्ब ३३ करोड ९७ लाख रुपैयाँ पुगेको छ । अघिल्लो आवमा कम्पनीले ९७ करोड ८३ लाख रुपैयाँ मात्रै खुद बीमा शुल्क आर्जन गरेको थियो ।

गत वर्ष कम्पनीले ७२ करोड ९५ लाख ३४ हजार रुपैयाँ खुद दावी भुक्तानी दिएको छ। यो अघिल्लो आवको तुलनामा ५६.६० प्रतिशत बढी हो । अघिल्लो आवमा पनि कम्पनीले ४६ करोड ५८ लाख रुपैयाँ दावी भुक्तानी दिएको थियो ।

गत आवमा कम्पनीले कुल २ अर्ब ४७ करोड २६ लाख रुपैयाँ आम्दानी गरेको छ । जुन अघिल्लो आवको तुलनामा ४४.१४ प्रतिशत बढी हो । यता, कुल खर्च भने १ अर्ब ४७ करोड ५१ लाख रुपैयाँ कायम भएको छ। अघिल्लो आवको तुलनामा कम्पनीको कुल खर्च ३७.४४ प्रतिशत बढी हो ।

गत आवमा कम्पनीको प्रतिसेयर आम्दानी (इपिएस) ७ रुपैयाँ ३८ पैसा बढेर २६ रुपैयाँ ७२ पैसा कायम भएको छ । यता, प्रतिसेयर नेटवर्थ १९१ रुपैयाँ ८३ पैसा छ ।

हाल कम्पनीको चुक्ता पुँजी २ अर्ब ५० करोड रुपैयाँ कायम भएको छ । कम्पनीको विशेष जगेडा कोषमा १ अर्ब ७४ करोड ४४ लाख रुपैयाँ रहेको छ। कम्पनीले महाविपत्ती कोषमा भने ७ करोड ३७ लाख रुपैयाँ कायम भएको छ ।