मुगु । प्राकृतिक स्रोत तथा वित्त आयोगले प्रदेश र स्थानीय तहहरूको कार्य सम्पादन मुल्यांकनको अन्तिम नतिजा सार्वजनिक गरेको छ । मुगुमा रहेका चारवटा स्थानीय तहहरूको कार्य सम्पादन मुल्यांकनमा मुगुम कार्मारोङ्ग गाउँपालिका प्रथम भएको छ ।

राष्ट्रिय प्राकृतिक स्रोत तथा वित्त आयोगले गत २५ गते देशभरका प्रदेश सरकार र स्थानीय तहहरूको कार्य सम्पादन मुल्यांकनको अन्तिम नतिजा सार्वजनिक गरेको थियो । सार्वजनिक गरेको नतिजा अनुसार, मुगु जिल्लाका चारवटा स्थानीय तहहरू मध्ये ६६ दशमलव ११ अंक ल्याउँदै मुगुम कार्मारोङ्ग गाउँपालिका प्रथम, ६१ दशमलव २० अंक ल्याउँदै सोरु गाउँपालिका द्वितीय, र ४३ दशमलव २३ अंक ल्याउँदै छायानाथ रारा नगरपालिका तेस्रो भएको छ । खत्याड गाउँपालिकाले ४२ दशमलव १४ अंक ल्याएको छ ।

आयोगले गत माघ ३० गते सार्वजनिक गरेको कार्य सम्पादन मुल्यांकनमा सोरु गाउँपालिका उत्कृष्ट कार्य सम्पादन गर्ने मुगु जिल्लाको स्थानीय तह ठहरिएको थियो, तर आयोगले त्यस समयमा नतिजामा चित्त नबुझेपछि पुनरावलोकनका लागि आयोगमा निवेदन दिन प्रदेश सरकार र स्थानीय तहहरूलाई सात दिने सूचना निकालेको थियो ।

कार्य सम्पादन मुल्यांकनका सबै सूचना आफ्नो गाउँपालिकाले पूरा गरेपनि अंक कम आएपछि हामीले पुनरावलोकनका लागि आवश्यक प्रमाणसहित वित्त आयोगमा निवेदन दिएका थियौं । जहाँ के त्रुटीले त्यो बेला कम अंक आएको रहेछ ।

अहिले पुनः मुल्यांकन गर्दा मुगुका अन्य स्थानीय तहहरूको भन्दा हाम्रो अंक प्रथम भएको छ। आयोगले प्रकाशित गरेको अन्तिम नतिजामा हामी मुगु जिल्लाका स्थानीय तहहरू मध्य उत्कृष्ट कार्य सम्पादन गर्ने स्थानीय तह भएका छौं, मुगम कार्मारोङ्ग गाउँपालिकाका प्रमुख प्रशासनिक अधिकृत सुवासचन्द्र रावलले बताए ।

राष्ट्रिय प्राकृतिक स्रोत तथा वित्त आयोगले विभिन्न १७ सूचकहरू तोकिएर सोही सुचक अनुसार स्थानीय तहहरूको कार्य सम्पादन मुल्यांकन गर्दै आएको छ । कार्य सम्पादन मुल्यांकनमा ल्याएको अंककै आधारमा वित्त आयोगले प्रदेश सरकार तथा स्थानीय तहलाई आगामी आर्थिक वर्ष २०८२÷०८३ को अनुदान प्रदान गर्नेछ ।

आयोगको मुल्यांकन वैज्ञानिक छ र मुल्यांकनको आधारमा अनुदान पनि दिने भएकाले स्थानीय तह तथा प्रदेश सरकारहरूले आफ्ना कार्य सम्पादनमा निखार र प्रभावकारीता ल्याउने, जिल्ला समन्वय समिती मुगुका प्रमुख मन्जन बहादुर कार्कीले विश्वास व्यक्त गरे ।

लिसा र एफआरएमा पनि मुगुम कार्मारोङ्ग नै अगाडि
स्थानिय तह वित्तीय सुशासन जोखिम मुल्यांकन (एफआरए) २०८०/०८१ मा मुगु जिल्लाका स्थानीय तहहरू मध्य मुगुम कार्मारोङ्गमा वित्तीय सुशासन देखिएको छ । ५ वटा सुचकमा गरिएको मुल्यांकन अनुसार मुगुम कार्मारोङ्ग गाउँपालिकाले ९१ दशमलव ५ अंक प्राप्त गरेर पहिलो, छायानाथ रारा नगरपालिकाले ९० दशमलव ५ अंक ल्याएर दोस्रो भएको छ भने सोरु गाउँपालिकाले ८३ अंक ल्याएर तेस्रो हुँदै गर्दा खत्याड गाउँपालिकाले ८२ अंक ल्याएको छ ।

स्थानिय तह संस्थागत क्षमता स्वमुल्यांकन (लिसा) २०८०/०८१ मा पनि मुगु जिल्लाका चार स्थानीय तहहरू मध्य मुगुम कार्मारोङ्ग गाउँपालिका नै पहिलो भएको छ । मुगम कार्मारोङ्ग गाउँपालिकाले लिसा मुल्यांकनमा तोकिएका १० वटा विषय तथा क्षेत्रमा ८९ अंक ल्याउँदै प्रथम हुन सफल भएको हो।

खत्याड गाउँपालिकाले ८५ दशमलव ५ अंक ल्याएर दोस्रो हुँदै गर्दा ८४ दशमलव २५ अंक ल्याएर छायानाथ रारा नगरपालिका तेस्रो भएको छ भने सोरु गाउँपालिकाले ८१ दशमलव २५ अंक ल्याएको थियो ।