नवलपरासी । नवलपरासी (बर्दघाट सुस्ता पश्चिम) को नेपाल–भारत सीमा नाका नजिकै स्थानीय अविनाश राय प्रहरीको गोली लागेर मरेको भन्ने विषयमा राष्ट्रिय मानव अधिकार आयोगले अनुगमन सुरु गरेको छ । प्रतापपुर गाउँपालिका, ६ कठहवामा शसस्त्र प्रहरीको गोली लागी स्थानीय २२ वर्षीय राय घाइते भएको र उनलाई थप उपचारको लागि बुटवल लैजाने क्रममा मृत्यु भएको भन्दै विभिन्न सञ्चार माध्यममा प्रकाशन÷प्रशारण भएका समाचारहरुप्रति आयोगले ध्यानाकर्षण गर्दै अनुगमन सुरु गरेको हो ।
आयोगका प्रवक्ता पोखरेलले लुम्बिनी प्रदेश कार्यालयले उक्त घटना सम्बन्धमा अनुगमन शुरु गरेको जनाएका छन् । उनले सीमा नाका बन्द रहेको अवस्थामा सीमा पार गर्न खोज्दा झडप भएको र सशस्त्र प्रहरीले गोली चलाउँदा स्थानीय अविनाश राय घाइते भएको र अस्पताल लैजाने क्रममा बाटैमा निजको मृत्यु भएको जानकारी आयोगलाई प्राप्त भएको जानकारी गराए ।

घटनाको विस्तृत विवरण उपलब्ध गराउन जिल्ला प्रशासन कार्यालय, जिल्ला प्रहरी कार्यालय र श्री सशस्त्र प्रहरी २६ नं. गण नवलपरासी (बर्दघाट सुस्ता पश्चिम) लाई आयोगले पत्राचार समेत गरिसकेको उनले बताए ।

२०७८ जेठ ६ गते प्रकाशित