भोलि २० अर्बको रिपो जारी गर्दै राष्ट्र बैंक
वि.सं.२०७८ भदौ १६ बुधवार
काठमाण्डौ। नेपाल राष्ट्र बैंकले भोलि भदौ १७ गते २० अर्ब रुपैयाँबराबरको रिपो जारी गर्ने भएको छ।
बैंकिङ प्रणाली तरलता सहज पार्न केन्द्रीय बैंकले सातदिने रिपो जारी गर्न लागेको हो।
राष्ट्र बैंकले रिपोको भोलि बोलकबोल गर्नेछ। रिपोमा सहभागी हुन चाहने वाणिज्य बैंक, विकास बैंक तथा वित्त कम्पनीहरुले दिउँसो ३ बजेसम्म अनलाइन बिडिङ गर्नुपर्नेछ।
राष्ट्र बैंक जारी गर्ने यो रिपो भदौ २४ गते परिपक्क हुनेछ।
बैंकिङ प्रणालीमा साधारण प्रकृतिको न्यून तरलताको स्थिति देखिएमा खुला बजार कारोबार सञ्चालन समितिको निर्णयानुसार अल्पकालीन अवधिको तरलता प्रवाह गर्न प्रयोग हुने उपकरणलाई रिपो भनिन्छ। यस उपकरणको निष्कासनका दिन बोलकबोलमा सफल बोलकर्ताको अर्थात बैंक तथा वित्तीय संस्थाहरुको राष्ट्र बैंकमा रहेको खातामा राष्ट्र बैंकले बाँडफाँटअनुसारको रकम जम्मा गरिदिने भएकोले तोकिएको समयावधिका लागि तरलता प्रवाह हुन जान्छ।
बोलकबोल प्रक्रियाबाट निष्कासन हुने यस उपकरणमा बहुब्याजदर विधिको प्रयोग गरिन्छ।
२०७८ भदौ १६ गते प्रकाशित
प्रकाशित समय : १८:३८ बजे
