काठमाडौँ । वीरगंज पथलैया औद्योगिक कोरिडर, सिमरामा रहेको जगदम्बा स्टील प्रा.लि.मा मिति २०७८ भदौं ११ गते विहान भएको तोडफोडमा संलग्न भएकाहरुलाई कारबाही गर्न नेपाल उद्योग वाणिज्य महासंघले माग गरेको छ ।

उद्योग समस्यामा परेको मौका छोपी स्थानीय जनता नै जवरजस्ती उद्योग परिसरमा प्रवेश गरी उद्योगका महत्वपूर्ण सरसामान, मेसिनहरू, पार्किङ गरी राखिएका सवारीसाधनहरू तोडफोड गरी ध्वस्त बनाउनुु अत्यन्त दुःखद रहेको जनाउँदै महासंघले दोषिलाई कारबाही गर्न माग गरेको हो ।

साथै महासंघले उक्त कार्यको घोर निन्दा एवं भत्सर्ना गर्दै स्थानीय तहमा संचालित उद्योग व्यवसायले स्थानीय जनतालाई रोजगारीका साथै त्यस क्षेत्रका जनताको आर्थिक जीवनस्तर सुुधारमा समेत निकै ठूलो सहयोग पुरयाईरहेको यथार्थता जग जाहेर रहेको बताएको छ ।
तर
भदौ ११ गते विहान १०ः१५ बजे उद्योगको अमोनिया ग्यांस टयांकबाट ग्यास लिक भई भएको घटना लगत्तै उद्योग परिसरभित्र स्थानीयहरू वलजफती प्रवेश गरी उद्योगमा तोडफोड भएको उद्योगले जनाएको छ ।

महासंघद्धारा जारी विज्ञप्तिमा “वार्ताबाट समस्या समाधान गर्न सकिने अवस्था हुदाहुदै तोडफोड हुनु दुर्भाग्यपूर्ण हो । यसले एकातिर उद्योग र स्थानीय जनता बीचको आपसी विश्वासमा कुठाराघात गर्छ भने अर्कोतिर उद्योगी व्यवसायीको मनोवल खस्कने, लगानी निरूत्साहित हुने र स्वदेशी एवं विदेशी लगानीकर्तामाझ नकारात्मक संदेश जानेतर्फ महासंघको गम्भीर चिन्ता छ । ” उल्लेख गरेको छ ।

साथै यस्ता कार्यमा संलग्नहरूको तत्काल पहिचान गरी दोषीलाई कानूनका दायरामा ल्याई कारवाही गर्न र उद्योग पूर्वावस्थामै संचालन गरी औद्योगिक वातावरण निर्माणमा सहयोग हुन महासंघले संघीय सरकार सहित तीनै तहका सरकार समक्ष गम्भीर आग्रह गरेको छ ।

२०७८ भदौ १५ गते प्रकाशित