काठमाडौँ । सिनर्जी पावर डेभलपमेन्ट लिमिटेडको लाभांश सुरक्षित गर्ने आज अन्तिम दिन हो । कम्पनीले साधारणसभा प्रयोजनको लागि भदौ ४ गतेदेखि भदौ १८ गतेसम्म बुक क्लोज गर्ने निर्णय गरेकोले आजसम्म कायम सेयरधनिले कम्पनीको सभामा भाग लिन र प्रस्तावित लाभांश पाउने छन् ।

कम्पनीले कम्पनीको १५ औ साधारणसभा भदौ १८ गते शुक्रबारको लागि आह्वान गर्ने निर्णय गरेको हो। कम्पनीले भर्चुअल माध्यमबाट सभा गर्न लागेको हो ।
सभामा लाभांश सहितका विभिन्न प्रस्ताव पेश हुने छन् । कम्पनीले आर्थिक वर्ष ७७–७८ सम्मको संचित मुनाफाबाट हाल कायम चुक्ता पुंजीको १० प्रतिशतले हुन आउने ७ करोड ३३ लाख २५ हजार बराबरको बोनस शेयर र कर प्रयोजनको लागि ०.५२६३ प्रतिशतले हुन आउने ३८ लाख ५९ हजार ९४ रुपैयाँ ७५ पैसा नगद लाभांश गरि कुल १०.५२६३ प्रतिशत लाभांश वितरण गर्ने प्रस्ताव गरेको हो । कम्पनीको आगामी साधारणसभाले पारित गरेपछि उक्त लाभांश लगानीकर्तामा बितरण हुने छ ।

साधारणसभामा हकप्रद निष्काशन प्रस्ताव समेत पेश हुने छ। कम्पनीले बोनस वितरण गरे पश्चात कायम हुने पुंजीको २ः१ को अनुपातमा हुन आउने हकप्रद शेयर निष्काशन गर्ने प्रस्ताव गरेको छ । कम्पनीको साधारणसभाले अनुमोदन गरेपछि हकप्रद निष्काशन प्रक्रिया अगाडी बढ्ने छ । यद्यपि कम्पनीको हकप्रदलाई विद्युत नियमन आयोग र नेपाल धितोपत्र बोर्डले स्वीकृति दिनु पर्ने छ ।

कम्पनीले अघिल्लो वर्ष ४.७५ प्रतिशत बोनस शेयर र कर प्रयोजनको लागि ०.२५ प्रतिशत नगद गरि कुल ५ प्रतिशत लाभांश वितरण गरेको थियो । यस कम्पनीले दोलखामा १० मेगावाटको सिप्रिन खोला आयोजना निर्माण सम्पन्न गरि बिद्युत उत्पादन गरिरहेको छ । कम्पनीले सोलुखुम्बुको होंगु खोलामा रहेको २२ मेगावाटको ‘मध्य होंगु खोला ए जलबिद्युत आयोजनामा स्वपुँजीको ४० प्रतिशत शेयर लगानी पनि गरेको छ। यस आयोजनाले विद्युत उत्पादनको सर्वेक्षण अनुमति प्राप्त गरि नेपाल विद्युत प्राधिकरणसँग विद्युत खरिद बिक्रि सम्झौता गरिसकेको जनाईएको छ ।

२०७८ भदौ ३ गते प्रकाशित