काठमाडौँ । नेपाल बैंक लिमिटेडले गत आर्थिक वर्षको चौथो त्रैमासको वित्तीय विवरण आज सार्वजनीक गरेको छ । सार्वजनिक वित्तीय विवरण अनुसार कम्पनीको गत आर्थिक वर्षको चौथो त्रैमासमा सबै वित्तीय सूचकमा चमक छाएको छ । समिक्षा अवधिमा कम्पनीको खुद नाफा ३१.४० प्रतिशत बढेर ३ अर्ब ६ करोड ५४ लाख ५७ हजार रुपैयाँ आर्जन भएको छ । अघिल्लो आवको सोही अवधिमा बैंकले खुद नाफा २ अर्ब ३३ करोड २८ लाख ८८ हजार रुपैयाँ आर्जन गरेको थियो ।

बैंकको असार मसान्तसम्ममा खुद ब्याज आम्दानी ६ अर्ब ४६ करोड ६ लाख ३६ हजार रुपैयाँ आर्जन भएको छ । जुन अघिल्लो आर्थिक वर्षको १४.९८ प्रतिशतले बढी हो । अघिल्लो आवको सोही अवधिमा यस्तो रकम ५ अर्ब ६१ करोड ८८ लाख १९ हजार रुपैयाँ थियो ।

समीक्षा अवधिमा बैंकको खुद फि तथा कमिशन आम्दानी १९.०१ प्रतिशत बढेर ८८ करोड ८२ लाख ५५ हजार रुपैयाँ, सञ्चालन मुनाफा २८.३५ प्रतिशत बढेर ४ अर्ब ४९ करोड ३४ लाख २४ हजार रुपैयाँ, कुल सञ्चालन मुनाफा १४.७२ प्रतिशत बढेर ८ अर्ब २२ करोड ७५ लाख ७१ हजार रुपैयाँ र वितरण योग्य मुनाफा ५८.२० प्रतिशत बढेर ३ अर्ब ४९ करोड ७० लाख २० हजार रुपैयाँ रहेको छ । बैंकको इम्पेरमेन्ट चार्ज समीक्षा अवधिमा ८७ करोड ९६ लाख रुपैयाँबाट घटेर ४१ करोड ८६ लाख रुपैयाँमा झरेको छ ।

समिक्षा अवधिमा बैंकको चुक्ता पूँजी १२ प्रतिशत बढेर १२ अर्ब ६३ करोड ६७ लाख ५८ हजार रुपैयाँ, जगेडा कोष ९.९९ प्रतिशत बढेर २० अर्ब ६२ करोड १९ लाख ५९ हजार रुपैयाँ, निक्षेप १४.९९ प्रतिशत बढेर १ खर्ब ६२ अर्ब ७४ करोड ३२ लाख २९ हजार रुपैयाँ र कर्जा ३०.२३ प्रतिशत बढेर १ खर्ब ३४ अर्ब ५३ करोड ६१ लाख ४२ हजार रुपैयाँ पुगेको छ ।

बैंकको प्रतिशेयर आम्दानी ३ रुपैयाँ ५८ पैसा बढेर २४ रुपैयाँ २६ पैसा पुगेको छ । बैंकको मूल्य आम्दानी अनुपात १८.२६ गुणा रहेको छ भने प्रतिशेयर नेटवर्थ २६३ रुपैयाँ १९ पैसा रहेको छ ।

२०७८ साउन २९ गते प्रकाशित