काठमाडौँ । सिभिल बैंक लिमिटेडले ३० लाख कित्ता ऋणपत्र निष्काशन गर्न लागेको छ । बैंकले ३ अर्ब रूपैयाँ बराबरको उक्त परिमाणको ऋणपत्र निष्काशन गर्न लागेको हो । बैंकले “९ प्र्रतिशत सिभिल बैंक ऋणपत्र २०८८” नाममा प्रतिकित्ता १००० रूपैयाँ अंकित दरले ऋणपत्र निष्कासन गर्न लागेको हो ।

बैंकको यो ऋणपत्रको प्रत्याभूती गर्नका लागि निष्कासन कम्पनी तथा प्रत्याभूतिकर्ता नागरिक लगानी कोष लगायत ग्लोबल आइएमई क्यापिटल, प्रभु क्यापिटल र माछापुच्छ्रे कृती क्यापिटलबीच प्रचलित धितोपत्र निष्कासन तथा बाँडफाँट निर्देशिका, २०७४ मा भएको व्यवस्था बमोजिम हिजो प्रत्याभूती सम्झौतापत्रमा हस्ताक्षर भएको छ ।

सिभिल बैंक लिमिटेडको तर्फबाट प्रमुख कार्यकारी अधिकृत सुनिल पोखरेल तथा नागरिक लगानी कोषको तर्फबाट कार्यकारी निर्देशक रमण नेपाल, ग्लोबल आइएमई क्यापिटलका प्रमुख कार्यकारी अधिकृत पारसमणी ढकाल, प्रभु क्यापिटलका प्रबन्ध निर्देशक दिनेश थकाली र माछापुच्छ्रे कृति क्यापिटलका प्रमुख कार्यकारी अधिकृत दिपेश कुमार वैद्यले संयूक्त हस्ताक्षर गरेका हुन् ।

सम्झौताअनुसार बैंकले निष्कासन गर्न लागेको ऋणपत्रहरु सर्वसाधारण र प्राइभेट प्लेसमेन्टबाट निष्कासन अवधिमा माग भए बमोजिम आवेदन प्राप्त हुन नआएमा बाँकी रहेको डिबेन्चर खरिद गर्ने दायित्व चारवटै प्रत्याभूतिकर्ताहरुले लिने छन् ।

प्रत्याभूतीकर्ताहरु नागरिक लगानी कोषले २ अर्ब, ग्लोबल आइएमई क्यापिटलले रु ३० करोड, प्रभु क्यापीटलले रु ३५ करोड र माछापुच्छ्रे कृति क्यापिटलले रु ३५ करोड बराबरको ऋणपत्र प्रत्याभुति गरेका हुन् ।

२०७८ साउन ४ गते प्रकाशित