सिरहामा उठ्यो लक्ष्यभन्दा ४४ प्रतिशत बढी राजस्व
वि.सं.२०७८ साउन ४ सोमवार
सिरहिा । सिरहामा आर्थिक वर्ष २०७७/०७८ मा लक्ष्यभन्दा ४४ प्रतिशत बढी राजस्व उठेको छ । सिरहाको ठाडी भन्सार कार्यालयका अनुसार गत आर्थिक वर्षमा लक्ष्यभन्दा २ करोड ८९ लाख ९२ हजार बढी राजस्व सङ्कलन गरेको हो ।
अर्थात, ६ करोड ५६ लाख २० हजार सङ्कलनको लक्ष्य रहेकामा ९ करोड ४६ लाख १२ हजार राजस्व सङ्कलन भएको हो ।
सिरहाको लहान–ठाडी सडकखण्डअन्तर्गत भगवानपुर गाउँपालिका–२ नरहामा सडक निर्माण कार्य भइरहेकाले सवारी साधन आवतजावत सहज नहुँदा समेत लक्ष्यभन्दा बढी राजस्व सङ्कलन भएको छ । कार्यालय स्रोतका अनुसार धान, गहुँ, फलफूल, तरकारी र टायल्सबाट बढी राजस्व उठेको हो ।
यता, यातायात व्यवस्था कार्यालय लहानले आव २०७७/०७८ मा ४३ करोड ७८ लाख १५८ राजस्व सङ्कलन गरेको छ । सवारीकर, आयकर, सवारी चालक अनुमतिपत्र, नवीकरण, जाँचपास, बाटो इजाजतपत्र, प्रदूषण, कम्पनी रजिष्ट्रेसनलगायत शीर्षकबाट सो राजस्व सङ्कलन भएको हो ।
कार्यालय प्रमुख मीन भट्टराईले सङ्कलन भएको राजस्वमध्ये १ करोड ७० लाख ३३ हजार ५७४ सङ्घीय सरकारको खातामा र ४२ करोड आठ लाख ३९ हजार ५८४ प्रदेश सरकारको खातामा जमा गरिएको बताए ।
२०७८ साउन ४ गते प्रकाशति
प्रकाशित समय : ०५:५७ बजे
