काठमाडौं । नेपाल राष्ट्र बैंकले बैंक तथा वित्तीय संस्था र भुक्तानी सेवा प्रदायक कम्पनीहरुलाई सीमित कर्मचारी परिचालन गरी अत्यावश्यक बैंकिङ सेवा सञ्चालन गर्न निर्देशन दिएको छ ।
विहिबार राष्ट्र बैंकले इजाजतपत्र तथा अनुमतिपत्रप्राप्त बैंक, विकास बैंक, वित्त कम्पनी तथा भुक्तानी प्रणालीसम्बन्धी कार्य गर्ने संस्थालाई निर्देशन जारी गर्दै संवेदनशिल प्रणाली सीमित कर्मचारीमार्फत सञ्चालन गरी अत्यावश्यक बैंकिङ तथा डिजिटल भुक्तानी सेवामा अवरोध नआओस् भन्ने उद्देश्यले निरन्तरता दिन आग्रह गरेको हो ।
अन्य कम जोखिमयुक्त प्रणालीको हकमा भने रिमोट एक्सेस अर्थात घरबाटै सञ्चालन गर्ने व्यवस्था मिलाउन पनि राष्ट्र बैंकले सुझाव दिएको छ । साथै, सञ्चालनमा रहेका शाखा, एटीएम तथा उपलब्ध सेवासम्बन्धी जानकारी आफ्ना वेबपेज र सामाजिक सञ्जालमार्फत सार्वजनिक गर्न समेत बैंक तथा वित्तीय संस्थाहरुलाई आग्रह गरिएको छ ।
यससँगै, राष्ट्र बैंकले सर्वसाधारणलाई पनि यथासम्भव डिजिटल बैंकिङ सेवा प्रयोग गर्न प्रेरित गर्न अनुरोध गरेको छ । यता, नेपाली सेनाले जारी गरेको विज्ञप्तिमा बैंक तथा वित्तीय संस्थाहरुलाई अत्यावश्यक सेवाभित्र समेटिएको उल्लेख गर्दै कार्यालयको परिचयपत्रका आधारमा कर्मचारीहरूको आवागमनमा सहजीकरण गरिने जनाएको छ ।
