काठमाडौं । सरकारले स्वास्थ्य सम्बन्धी महत्वपूर्ण सामग्री आयातका लागि डलर सटही सुविधाको सीमा हटाएको छ । कोरोना महामारीको त्रास बढ्दै गएको र अक्सिजनको समेत अभाव देखिएपछि अक्सिजनजन्य स्वास्थ्य सम्बन्धी सामाग्री  आयातलाई सहज बनाउँने उद्देश्यका साथ नेपाल राष्ट्र बैंकले डलर सटहीमा लाग्ने सीमा हटाइदिएको हो ।

अहिले प्रतितपत्र (एलसी) विना ड्राफ्ट र टीटीको माध्यमबाट हुने वस्तु आयातका लागि सटही सुविधा बढीमा एक पटकमा अमेरिकी डलर ३५ हजार वा सो बराबरको परिवर्त्य विदेशी मुद्रासम्मका लागि मात्र प्रदान हुने व्यवस्था रहेको छ ।

यद्यपी अब भने स्वास्थ्य मन्त्रालय, स्वास्थ्य सेवा विभागको सिफारिसमा गरिने कोभिड–१९सँग सम्बन्धित औषधिजन्य सामाग्रीहरु तथा स्वास्थ्य उपकरणहरुको आयातको हकमा एउटै बीजकबाट अमेरिकी डरल एक लाख सम्मको ड्राफ्ट वा टि.टिको माध्यमबाट भुक्तानी गर्न सकिने भनेको छ । तर, सोही भन्दा बढीको सटही सुविधा आवश्यक परेमा भने स्वास्थ्य सेवा विभागको सिफारिससहित स्वीकृतिका लागि राष्ट्रबैंकमा निवेदन दिनु पर्ने छ ।
साथै, अक्सिजन सिलिण्डर, अक्सिजन ट्यांकी, अक्सिजन जेनेरेटर लगायत अक्सिजनका अन्य सामग्रीहरु आयात गर्दा असार मसान्तसम्म उल्लिखित व्यवस्था अनिवार्य नहुने भएको छ ।
राष्ट्र बैंकका डेपुटी गभर्नर बमबहादुर मिश्रले अक्सिजन लगायतका जीवनोपयोगी सामग्री चाँडो भन्दा चाँडो आयात गर्न सहज गराउन यस्तो व्यावस्था गरेको बताए ।

२०७८ वैशाख ३० गते प्रकाशित