काठमाडौं । वाणिज्य बैंकहरुले एकै वर्ष सरकारलाई ३० अर्ब रुपैयाँ आयकर बुझाएका छन् । गत आर्थिक वर्ष २०८०–८१ मा हाल संचालनमा रहेका २० वटा बाणिज्य बैंकहरुले आम्दानी बापत सो बराबरको आयकर बुझाएका हुन् ।
गत वर्ष बैंकहरुले सरकारलाई २९ अर्ब ९८ करोड ८९ लाख रुपैयाँ आयकर बुझाएका छन् । जुन अघिल्लो आवको तुलनामा १५.७३ प्रतिशत बढी हो । अघिल्लो आवमा पनि बैंकहरुले २५ अर्ब ९१ करोड २८ लाख रुपैयाँ आयकर तिरेका थिए ।
बैंक तथा वित्तीय संस्थाहरुले आम्दानीको ३० प्रतिशत कर तिर्नुपर्ने पर्छ । बैंकहरुले करपछिको नाफामा १० प्रतिशत कर्मचारी बोनस छुट्याएपछि आउनेमा ३० प्रतिशत आयकर सरकारलाई बुझाउनु पर्ने प्रवाधान छ ।
गत वर्ष ९ वटा बैंकहरुको आयकर मात्रै घटेको छ । तर, त्यसबाहेक अन्य बैंकको भने बढेको देखिन्छ ।
गत वर्ष सबैभन्दा धेरै आयकर नबिल बैंकले बुझाएको छ । एक वर्षको आम्दानीबाट बैंकले सरकारलाई २ अर्ब ७३ करोड ५२ लाख रुपैयाँ आयकर तिरेको हो । यद्यपि, अघिल्लो आवको तुलनामा भने यो ४.९ प्रतिशत कमी हो ।
नबिलसहित प्रभु, ग्लोबल आइएमई र नेपाल इन्भेष्टमेन्ट मेगा बैंक (एनआइएमबि)ले सर्वाधिक कर बुझाएका छन् । यी बैंकहरुले गत वर्ष सरकारलाई २ अर्ब भन्दा बढी आयकर तिरेका हुन् ।
सर्वाधिक आयकर बुझाउनेको दोस्रो सूचीमा प्रभु बैंक देखिएको छ। गत वर्ष बैंकले अघिल्लो आवको तुलनामा १२६.२१ प्रतिशत बढाएर २ अर्ब ५७ करोड ३६ लाख रुपैयाँ आयकर बुझाएको छ । यता, ग्लोबल आइएमई बैंकले भने २ अर्ब ५५ करोड १२ लाख रुपैयाँ र एनआइएमबिले २ अर्ब १४ करोड ४१ लाख रुपैयाँ आयकर सरकारलाई बुझाएका छन् ।
अघिल्लो आवको तुलनामा सबैभन्दा धेरै आयकर तिर्नेमा कुमारी, हिमालयन बैंक शीष सूचीमा छन् । अघिल्लो आवमा कुमारी बैंकले ४८ करोड ३७ लाख रुपैयाँ मात्रै आयकर सरकारलाई बुझाएका थियो । तर, गत वर्ष भने २३५ प्रतिशत बढाएर १ अर्ब ६२ करोड ५ लाख रुपैयाँ बुझाएको छ । यता, हिमालयन बैंकको पनि १६४.४९ प्रतिशत बढेर १ अर्ब २० करोड ८३ लाख रुपैयाँ कायम भएको छ ।
गत वर्ष आफ्नो नाफाबाट एभरेष्ट बैंकले पनि १ अर्ब ९० करोड ४ लाख रुपैयाँ आयकर बुझाएको छ । यस्तै, राष्ट्रिय वाणिज्य बैंकले १ अर्ब ८९ कारेड ९४ लाख, प्राइमले १ अर्ब ६५ करोड ३९ लाख, कृषि विकासले १ अर्ब ६४ करोड ३ लाख, सिद्धार्थले १ अर्ब ३४ कारेड ४५ लाख, लक्ष्मी सनराइजले १ अर्ब २३ कारेड ५७ लाख, नेपाल बैंकले १ अर्ब २३ करोड ४६ लाख र एनएमबिले १ अर्ब ६६ लाख रुपैयाँ आयकर बुझाएका छन् ।
यस्तै, सानिमा बैंकले ९७ करोड २३ लाख, नेपाल एसबिआईले ८६ करोड ५३ लाख, सिटिजन्सले ७४ करोड ४३ लाख, माछापुच्छ्रेले ६९ करोड ५ लाख र एनआइसी एशियाले ५४ करोड ९३ लाख रुपैयाँ सरकारलाई आयकर तिरेका छन् ।
कुन बैंकले सरकारलाई कति बुझाए आयकर ?
