काठमाडौं । उपप्रधानमन्त्री तथा शहरी विकासमन्त्री प्रकाशमान सिंहले नगरपालिका पूर्वाधार लगानी शिखर सम्मेलन २०२४ मा नेपालका शहरी पूर्वाधारको चुनौती समाधानका लागि निजी क्षेत्रको साझेदारी र नवप्रवर्तनशील रणनीतिहरूको आवश्यकतामा जोड दिएका छन् ।

काठमाडौंमा सोमबार आयोजित उक्त सम्मेलनलाई सम्बोधन गर्दै सिंहले यस्तो बताएका हुन् ।

उपप्रधानमन्त्री तथा शहरी विकासमन्त्री सिंहले नगर विकास कोषले नगरपालिका पूर्वाधार निर्माणका लागि दीर्घकालीन वित्तीय समाधानहरू जुटाउँदै जीवनस्तर सुधार र स्थानीय अर्थतन्त्रलाई बलियो बनाउने महत्त्वपूर्ण भूमिका निर्वाह गरिरहेको बताएका छन् ।

‘नेपाल १९९० को दशकसम्म विश्वका सबैभन्दा कम शहरीकरण भएका देशमध्ये एक भए पनि पछिल्ला वर्षहरूमा शहरीकरणको दर तीव्र छ । १९९० देखि २०१४ सम्म, नेपाललाई विश्वका तीव्र शहरीकरण भएका शीर्ष १० देशमध्ये राखिएको थियो,’ सिंहले भने ।

उनले नगरपालिकाहरूले शहरी पूर्वाधार र सेवा प्रवाहका लागि बढ्दो माग पूरा गर्न संघर्ष गरिरहेको उल्लेख गरेका छन् । २०१७ को राष्ट्रिय शहरी विकास रणनीतिले शहरी क्षेत्रमा पूर्वाधार लगानी अन्तरलाई पूर्ति गर्न १५ वर्षमा झण्डै ४,८६९ अर्ब रुपैयाँ आवश्यक पर्ने अनुमान गरेको तथ्य प्रस्तुत गर्दै उनले सरकारी स्रोत र अन्तरसरकारी वित्तीय हस्तान्तरण मात्र पर्याप्त नहुने बताए ।

सिंहले सम्मेलनमा सरकारको प्रयासहरूलाई निजी क्षेत्र, विकास साझेदार र बहुपक्षीय वित्तीय संस्थाहरूसँगको साझेदारीद्वारा सुदृढ गर्नुपर्नेमा जोड दिए । उनले नेपाल पूर्वाधार शिखर सम्मेलन २०२४ का क्रममा विशेषज्ञहरूले लगानीमैत्री वातावरण सिर्जनाका लागि थप पहल आवश्यक भएको धारणा व्यक्त गरेको स्मरण गरेका छन् ।

कर्पाेरेट बजार

प्रकाशित समय : १४:१६ बजे