काठमाडौं । अमेरिकन चेम्बर अफ कमर्सले नेपालको सरकारलाई एक ज्ञापन पत्र बुझाउँदै लगानीको वातावरण सुधार्नका लागि विभिन्न रणनीतिक सुझाव दिएको छ ।

ज्ञापनपत्रमा विभिन्न व्यावसायिक क्षेत्रको विकास र नेपाल र अमेरिकाबीचको आर्थिक सम्बन्धलाई मजबुत बनाउनका लागि अनुकूल वातावरण निर्माण हुनपर्नेमा जोड दिइएको छ ।

नेपालका कृषि तथा परामर्श सेवाका क्षेत्रमा अमेरिकी लगानीको विस्तारको पहल गर्न सुझाव दिइएको छ । त्यस्तै एमच्यामले २ लाख अमेरिकी डलरभन्दा माथिको लगानीको लागि व्यापार दर्ता प्रक्रियामा सजिलो बनाइनुपर्ने जनाएको छ ।

एमच्यामले उद्योग विभागबाट दर्ता प्रक्रिया सरल र छिटो बनाउन पहल हुनुपर्ने माग गरेको छ । यसले विदेशी व्यावसायीहरू नेपालमा पूँजी ल्याउन र लगानी गर्न उत्साहित हुने जनाइएको छ । त्यस्तै, कमाइ रकम स्वेदश फिर्ताको प्रक्रिया पनि सहजर र सुविधाजनक बनाउनुपर्ने एमच्यामको माग छ ।

द्रुत गतिमा बढिरहेको सूचना प्रविधि क्षेत्रमा अमेरिकी प्रविधि कम्पनीहरूको ठूलो लगानीको सम्भावनाबारे पनि एमच्याम चासो व्यक्त गरेको छ । यसले नेपाल सरकारलाई अनुकूल र लचिलो नियम बनाउन ध्यानकर्षण गरिएको छ ।

त्यसो भएको खण्डमा नेपाल अन्तर्राष्ट्रिय प्रविधि कम्पनीहरूको आकर्षक गन्तव्य बन्ने एमच्यामको भनाइ छ । करका दरहरू स्थिर हुनुपर्ने विषय पनि एमच्यामले उठाएको अर्को महत्त्वपूर्ण मुद्दा हो । लगानीकर्ताहरूका लागि स्थिर र पूर्वानुमान गर्न सकिने कर वातावरण बनाउनुपर्ने पनि ज्ञापनपत्रमा उल्लेख छ ।

यसले दीर्घकालीन लगानीको वातावरण तयार गर्ने र अमेरिकी लगानीकर्तालाई नेपालमा विश्वास बढ्ने जनाइएको छ । एमच्यामले प्रतिस्पर्धा र उपभोक्ता संरक्षणको सुनिश्चितता गर्दै लगानीलाई प्रवर्द्धन गर्नका लागि नेपाल सरकारसँग सवारी साझेदारी उद्योगका लागि स्पष्ट नियमहरू बनाउन आग्रह गरेको छ ।

डबल कर प्रणालीको मुद्दामा, एमच्यामले नेपाल सरकारसँग अमेरिकासँग मिलेर दोहोरो कर हटाउने सम्झौता लागू गर्न पहलका लागि पनि आग्रह गरेको छ । अमेरिकी लगानीकर्ताहरूका लागि भिसा प्रक्रिया सरल बनाउनका लागि पनि एमच्यामले सुझाव दिएको छ । यसले नेपालमा व्यवसाय स्थापना वा विस्तार गर्ने प्रक्रियालाई सजिलो बनाउने दाबी गरिएको छ ।

एचच्यामले भ्याटसम्बन्धी मुद्दा र कर संरचना सुधारसँगै मनी लाउन्डरिङ नीतिको मजबुत कार्यान्वयनका लागि पनि माग गरेको छ । सामाजिक सञ्जालको प्रयोगसँगै यससम्बन्धी कानुनको विषयमा पनि एमच्यामले सरकारलाई सन्तुलित र विचारशील दृष्टिकोण अपनाउन आग्रह गरेको छ ।

यसले स्थानीय चासोको रक्षा गर्नुका साथै डिजिटल अर्थतन्त्रको वृद्धिमा पनि मद्दत पुर्‍याउने एमच्यामको भनाइ छ । त्यस्तै, एमच्यामले नेपाली नागरिकलाई वित्तीय सुरक्षा प्रदान गर्नका लागि बैंक एसुरेन्ससम्बन्धी व्यवस्था गर्न पनि सिफारिस गरेको छ ।